Të paktën 51 persona kanë vdekur pas shirave të dendur që shkaktuan përmbytje të shpejta në Spanjën juglindore, thanë autoritetet. Vendi u godit rëndë nga reshjet e dendura dhe stuhitë breshëri, të cilat shkaktuan përmbytje të shpejta në disa rajone.
Operacionet e shpëtimit janë duke vazhduar dhe presidenti i rajonit të Valencias, Carlós Mazón, tha se për momentin është “e pamundur” të përcaktohet me saktësi numri përfundimtar i viktimave.
Pamjet e postuara në mediat sociale tregojnë ujërat e rrëmbyeshëm që bëjnë kërdinë, shembjen e urave dhe zvarritjen e makinave nëpër rrugë. Pamjet e tjera tregojnë njerëz që ngjiten pas pemëve për t’i mbajtur ata që të mos fshihen nga uji.
Shërbimi Meteorologjik Spanjoll raportoi se Chiva, në rajonin e Valencias, mori 491 mm shi në vetëm tetë orë të martën, që është e barabartë me reshjet vjetore.
Stacionet radio dhe televizive kanë marrë qindra thirrje për ndihmë nga njerëz të bllokuar në zonat e përmbytura ose në kërkim të njerëzve të dashur, ndërsa ekipet e shpëtimit përpiqen të arrijnë në vende të caktuara.
Agjencia Kombëtare Meteorologjike e Spanjës (AEMET) shpalli alarmin e kuq në rajonin e Valencias dhe nivelin e dytë më të lartë të paralajmërimit në pjesë të Andaluzisë.
Përmbytjet shkaktuan ndërprerje në trafik; disa fluturime që duhej të uleshin në Valencia u devijuan në qytete të tjera, ndërsa disa u anuluan. Të gjitha linjat hekurudhore në rajonin e Valencias janë pezulluar, njoftoi operatori kombëtar i infrastrukturës hekurudhore ADIF.
Administrata e qytetit të Valencias njoftoi se të mërkurën do të pezullohen të gjitha shkollat dhe aktivitetet sportive, dhe parqet do të mbeten të mbyllura.
Kryeministri spanjoll Pedro Sanchez tha në një postim në X se ai po ndiqte me shqetësim raportet e personave të zhdukur.
Ai u bëri thirrje qytetarëve që të ndjekin udhëzimet e autoriteteve, duke shtuar se njerëzit duhet “të shmangin udhëtimet e panevojshme”.
