Politologu Melazim Koci në RTK Prime ka komentuar Raportin e Progresit për Vendin duke vënë theksin te disa prej tyre. Ai përmendi faktin që Kosovës i është kërkuar ta dërgojë draftin në Gjykatë Kushtetuese ndërkaq Serbisë vetëm të njohë dokumentet, simbolet shtetërore dhe institucionet e Kosovës e nuk apostrofohet njohja.
Ai ka thënë se në këtë raport është përdorur fjalor burokratik që lë mundësinë e interpretimit të dyfishtë, që sipas tij opozita mund të thotë që është raporti më i keq e pozita raporti më i mirë.
Koci ka theksuar se në raport thuhet se marrëveshja franko-gjermane është ligjërisht dhe ndërkombëtarisht e detyrueshme duke e përjashtuar sipas tij kërkesën e kryeministrit Kurti për nënshkrim.
Ai u fokusua te disa çështje.
“Në raport thuhet se marrëveshja franko-gjermane është ligjërisht e ndërkombëtarisht e obligueshme dhe përjashtohet mundësia e formalizimit, nënshkrimit gjë që kryeministri Kurti e ka kërkuar në vazhdimësi”, tha Melazim Koci në “RTK Prime”.
Sipas tij, tash mbetet që Qeveria e Kosovës ta shpjegoj këtë çështje e cila sipas tij ka mbetur pezull.
“Sipas Konventës së Vjenës, këto dokumente mund të kalojnë edhe pa nënshkrim nëse palët janë pajtuar. Brukseli disa herë e ka përsëritur që palëve kjo formë u është prezantuar dhe se ato janë pajtuar. Nga Qeveria e Kosovës nuk ka pasur demantim në kuptimin që nuk qëndron, nuk është e vërtetë. I mbetet Qeverisë së Kosovës ta thotë nëse është pajtuar në Ohër për një gjë të tillë apo jo”.
Si çështje të dytë politologu Koci e ka përmendur çështjen e Asociacionit.nTha se aty ka një lloj paragjykimi, madje tha se mund të konsiderohet edhe formë presioni ndaj Gjykatës Kushtetuese.
“Është një lloj paragjykimi. Thuhet drafti i statutit të asociacionit është plotësisht në përputhje me kornizën kushtetuese të Kosovës. Do të thotë kërkohet që drafti të dërgohet në kushtetuese, por ky formulim më duket paragjykues. Nëse thua që është në përputhje me kornizën kushtetues të Kosovës. Shtrohet pyetja se çfarë pune pastaj ka Gjykata Kushtetuese dhe a mund të konsiderohet kjo presion mbi Gjykatën Kushtetuese. Unë mendoj se krejt çfarë është dashur të thuhet në raportin e komisionit është dashur të kërkohet të dërgohet në Gjykatë, por jo të paragjykohet”, tha ai.
Ai përmendi faktin që Kosovës i është kërkuar ta dërgojë draftin në gjykatë ndërkaq Serbisë vetëm të njohë dokumentet, simbolet shtetërore dhe institucionet e Kosovës e nuk apostrofohet njohja.
