“Raporti i Progresit për Vendin është një vlerësim shumë real në kuptimin që të jep informata kthyese. P.sh, e ke pasur detyrë të kryesh këtë, por nuk ke arritur ta kryesh këtë”. Kështu ka deklaruar analistja Besa Luzha duke folur për raportin e publikuar sot.
“Ky është rrugëtimi ynë drejt Bashkimit Evropian me kapituj, nivele e detyra të shtëpisë që duhet t’i kryejmë”, tha ajo në “RTK Prime”.
Sipas saj, në raport vlerësohet fakti që Kosova nuk është tërhequr nga dialogu me Serbinë dhe ka mbetë e përkushtuar, por tutje tha se vendi është kritikuar për qasjen e tregut rajonal e marrëveshjen më CEFT-en.
Mes tjerash Luzha tha se në raport presioni ndaj Kosovës është shumë më i madh kurse presioni ndaj Serbisë është “pak si duke e marrë me të mirë”.
Analistja Besa Luzha tutje u fokusua më shumë në çështjet sociale të përmendura në këtë raport, dhe theksoi se raporti duhet të merret si një vlerësim real se ku jemi duke çaluar.
“Është një veprim shumë i mirë sespe ne jemi duke ecur përpara në rrugëtimin tonë dhe ka shumë fusha, diku kemi rezultat të mirë, diku rezultat mesatar e diku kemi ngelë në klasë, as 2-shin nuk e kemi marrë. Përshembull aty ku thuhet nuk ka fare progres në përfshirjen e konsiderimeve gjinore, në politika legjislacion e në trajtimin e buxhetit, për mua kjo ishte shumë e çuditshme sepse përdoret fjala nuk ka fare progres. Përmendet buxheti gjinor që nuk është trajtuar sa duhet e sa më kujtohet ka qenë një lloj proteste publike që është bërë thirrje që duhet të trajtohet buxheti në aspektin gjinor”, tha ajo.
Ajo tutje përmendi edhe edukimin gjithëpërfshirës ku tha 88 se për qind e fëmijëve me aftësi të kufizuara mbeten jashtë procesit mësimor edhe ata 12 për qind që arrijnë të jenë pjesë e procesit arsimor nuk i kanë shërbimet e kushtet e duhura.
“Ne kemi qenë dëshmitar rishtazi të një lloj debati nëpër shkolla ka kërkesa për asistent që ka një buxhet në Ministrinë e Arsimi por që kjo nuk shkon më tutje e nuk bëhet rekrutimi i tyre”, deklaroi Luzha.
