Ministri i Mbrojtjes, Ejup Maqedonci sot u prit në takim nga zëvendëskryeministri dhe ministri i Mbrojtjes së Katarit, Khalid bin Mohammad Al Attiyah. Maqedonci ka njoftuar se Al Attiyah i ofroi gjashtë kuota për edukim të kadetëve të Kosovës në akademitë ushtarake të Katarit.
“Ministrin Al-Attiyah e falënderova për mbështetjen nga shteti i Katarit, si dhe për angazhimin e tij personal për thellimin e marrëdhënieve nga pozicioni paraprak i Ministrit të Punë të Jashtme të Katarit”, ka shkruar Maqedonci në Facebook.
Maqedonci ka bërë të ditur se me homologun Al Attiyah kanë diskutuar për vendosjen e urave të bashkëpunimit në fushën e mbrojtjes në mes të dy vendeve.
“U dakorduam për bashkëpunim në fushën e trajnimeve dhe edukimit ushtarak si dhe mundësisë për investime të përbashkëta në fushën e prodhimit ushtarak. Nga ana e tij Ministri Al Attiyah ofroi 6 kuota për edukim të kadetëve tanë në akademitë ushtarake të Katarit, duke përfshirë dhe Akademinë e Forcave Ajrore të Katarit”, ka shkruar Maqedonci.
Tutje ai njoftoi se ekipet e të dyja ministrive do të angazhohen për të hartuar një memorandum mirëkuptimi që do të trajtonte në detaje formatet e bashkëpunimit. /Kosovatimes/
