Kryetarja e Komisionit për Mbikëqyrjen e Agjencisë së Kosovës për Inteligjencë, Ganimete Musliu në një konferencë për medie, ka thënë se pas dështimit të raportimit të drejtorit të AKI-së, Petrit Ajeti, u tentua të pengohet edhe takimi bashkëbisedues me të pas mbledhjes nga deputeti i LV-së, Salih Zyba.
“E patë se çka ndodhi në mbledhje, u pengua që të mbahet mbledhja. Duke ndjekur me shqetësim raportimet e mediave ndaj AKI-së, e thirrëm një mbledhje. Komisioni me mbështetjen e 1/3 të komisionit, ka ftuar drejtorin e AKI-së, Petrit Ajeti për raportimet se disa gazetarë po përndiqen nga zyrtarë të AKI-së dhe ndikimin e Dejona Mihalit në disa institucione të rëndësishme”, tha Musliu.
Ajo ka thënë se megjithëse u pengua mbajtja e mbledhjes së Komisionit, ajo ka pasur një bashkëbisedim me Ajetin, por edhe aty, sipas saj, është penguar sërish nga deputeti i VV-së, Salih Zyba.
Ndër të tjera Musliu theksoi se kërkuan nga drejtori i AKI-së ta ruajë integritetin dhe imazhin e AKI-së.
Ajo tha se misioni i AKI- së është identifikimi i kërcënimeve që rrezikojnë sigurinë e Kosovës.
“Agjencia nuk është as e imja, nuk është as e qeverisë as e presidencës por është e Kosovës”, tha deputetja e PDK-së, Ganimete Musliu.
Ajo u pyet nga gazetarët për shkrimin e “Slobodna Bosna” dhe nëse kanë kërkuar një hetim të brendshëm në AKI.
“Tani jemi në përfundim të mandatit parlamentar të kësaj legjislature dhe çdo iniciativë e jona hetimore për çfarëdo qoftë do të merret me pretekstin se ne po mundohemi të bëjmë fushatë zgjedhore dhe duke u bazuar se këto iniciativa mund ta dëmtojnë edhe më tepër institucionin e AKI –së, ne nuk kemi bërë ndonjë kërkesë ose hetim për këtë çështje. Mirëpo kishte dakordancë dhe vullnet nga drejtori i AKI-së që ne si komisionin të shkojmë në AKI dhe të kemi qasje në dokumente të cilat e garantojnë transparencën dhe ligjshmërinë e vendimeve dhe procedurave që i ndjek AKI”, tha Musliu.
