Të paktën katër persona janë zhdukur pasi shiu i madh shkaktoi përmbytje të shpejta në Spanjën jugore dhe lindore, duke ndërprerë trafikun dhe lidhjet hekurudhore të shpejtësisë së lartë, shkruan Guardian .
Përmbytja goditi ditën e djeshme qytetin Letur në provincën lindore të Albacete. Sipas videove të publikuara në rrjetet sociale, përrua barti makina në rrugë.
Punonjësit e urgjencës janë në kërkim të tre ose katër personave që u zhdukën pas përmbytjeve, tha kryetari i bashkisë Letur Sergio Marín Sánchez për televizionin publik spanjoll.
“Disa persona ishin në automjet dhe të tjerë në shtëpi”, tha ai.
Trenat me shpejtësi të lartë janë pezulluar midis Madridit dhe portit lindor të Valencias
Policia në qytetin L’Alcúdia në rajonin lindor të Valencias tha se po kërkonte një shofer kamioni i cili ishte zhdukur që nga pasditja e hershme.
Operatori kombëtar i infrastrukturës hekurudhore ADIF tha se kishte pezulluar trenat me shpejtësi të lartë midis Madridit dhe portit lindor të Valencias për shkak të efekteve të stuhisë në pikat kryesore të rrjetit hekurudhor në rajon.
Një tren me shpejtësi të lartë me 276 pasagjerë doli nga shinat në rajonin jugor të Andaluzisë, por askush nuk u lëndua, tha qeveria rajonale në një deklaratë.
Shërbimet e urgjencës shpëtuan dhjetëra njerëz në Álora, Andaluzi, disa me helikopterë, pas vërshimit të një lumi.
Një alarm i kuq është shpallur në rajonin e Valencias dhe niveli i dytë më i lartë i alarmit në pjesë të Andaluzisë
Agjencia shtetërore meteorologjike AEMET shpalli alarmin e kuq në rajonin e Valencias dhe nivelin e dytë më të lartë të alarmit në pjesë të Andaluzisë. Disa rrugë janë mbyllur në të dy rajonet për shkak të përmbytjeve.
Shiu intensiv i atribuohet një fenomeni të njohur si “gota fría”, ose “pika e ftohtë”, e cila ndodh kur ajri i ftohtë lëviz mbi ujërat e ngrohta të Detit Mesdhe.
Kjo krijon paqëndrueshmëri atmosferike dhe bën që ajri i ngrohtë dhe i ngopur të ngrihet me shpejtësi, duke çuar në formimin e reve të larta kumulonimbus brenda disa orësh dhe shi të dendur në pjesët lindore të Spanjës.
Shkencëtarët paralajmërojnë se kushtet ekstreme të motit si valët e të nxehtit dhe stuhitë po bëhen më intensive si pasojë e krizës klimatike.
