Kryetari i Aleancës për Ardhmërinë e Kosovës, Ramush Haradinaj, ka mbledhur sot kryesinë e partisë për të diskutuar dhe përgatitur për zgjedhjet parlamentare që do të mbahen me 9 shkurt 2025. Haradinaj ka informuar kryesinë edhe për vizitën në Shtetet e Bashkuara të Amerikës.
“Në mbledhjen e sotme të kryesisë së Aleancës u diskutua për orientimet programore dhe agjendën e parafushatës, si dhe u miratua rregullorja e brendshme financiare e AAK-së. Gjithashtu, pata mundësinë t’i informoj kolegët për vizitën time të fundit në Shtetet e Bashkuara të Amerikës. Gjatë qëndrimit tim në ShBA, theksi kryesor u vendos në kërkesën për anëtarësimin e drejtpërdrejtë të Kosovës në NATO. Ky hap përfaqëson kthesën më të rëndësishme për sigurinë e Kosovës dhe elementin kyç për garantimin e zhvillimit ekonomik dhe ngritjen e standardit të jetesës për qytetarët tanë, duke përfshirë pagat dhe pensionet e dinjitetshme”, ka shkruar Haradinaj në Facebook.
Ai tutje ka theksuar se anëtarësimi në NATO është një strategji gjithëpërfshirëse. “Anëtarësimi në NATO është një strategji gjithëpërfshirëse që do të përmirësonte sistemet arsimore dhe shëndetësore, si dhe do të hapte perspektivë zhvillimi që do të ishte shtysë e madhe për qëndrimin e popullatës në vend, emigrimi i së cilës ka marrë përmasa shqetësuese. Kjo qasje pasqyron vizionin e gjerë që kërkon udhëheqja kombëtare. Duke e parë anëtarësimin në NATO si një përgjigje për zhvillimin e përgjithshëm të vendit, Aleanca dhe partnerët e saj të koalicionit po ndërmarrin një hap ambicioz drejt një të ardhmeje më të sigurt dhe më të begatë për Kosovën”, është shprehur Haradinaj. /Kosovatimes/
