Ministria e Kulturës, Rinisë dhe Sportit ka njoftuar se në kuadër të angazhimit për fuqizimin e bashkëpunimit ndërinstitucional dhe për ta siguruar mbrojtjen e trashëgimisë kulturore, ka themeluar grupin koordinues ndërinstitucional për mbrojtjen e trashëgimisë kulturore.
Sipas njoftimit të MKRS-së, ky grup ka për qëllim të hartojë dhe zbatojë masa konkrete që rrisin efikasitetin për mbrojtjen e monumenteve dhe trashëgimisë kulturore të Kosovës.
“Grupi përbëhet prej 7 anëtarëve nga përfaqësuesit më të lartë të institucioneve tona: ministri i Kulturës, Hajrulla Çeku, ministrja e Drejtësisë, Albulena Haxhiu, ministri i Infrastrukturës, Liburn Aliu, zëvendësministri i Punëve të Brendshme, Blerim Gashani, përfaqësuesi i Këshillit Gjyqësor të Kosovës, Valon Totaj, përfaqësuesja e Këshillit Prokurorial të Kosovës, Ariana Shajkovci, përfaqësuesi i Policisë së Kosovës, Arbnesh Ajvazi”, thuhet në njoftim.
Po ashtu, njoftohet se në takimet e rregullta që do të zhvillojë grupi koordinues, do të diskutohet dhe do të vendoset për hapat që do të ndërmerren për të siguruar që masat dhe politikat e mbrojtjes të trashëgimisë të jenë gjithmonë në përputhje me sfidat dhe nevojat aktuale. /Kosovatimes/
