Mbrëmë, me ftesë dhe organizim të Shoqatës së Studentëve shqiptarë, Kryeministri i Republikës së Kosovës, Albin Kurti, mbajti një ligjëratë për studentë të Universitetit të St. Gallen (HSG) dhe pati një diskutim e bashkëbisedim me studiuesin e njohur të marrëdhënieve ndërkombëtare, Prof. Dr. Christoph Frei, mbi temën “Investimi në të ardhmen e Kosovës: roli i politikës dhe ekonomisë në formësimin e mundësive dhe tejkalimin e sfidave për gjeneratat e ardhshme”.
Në adresimin e tij ai foli për progresin demokratik të njohur tashmë ndërkombëtarisht dhe rritjen ekonomike, si dhe lidhjen në mes tyre. Kryeministri Kurti para studentëve argumentoi se Republika e Kosovës ofron një rast dhe shembull studimi për tezën e nobelistëve në ekonomi, Daron Acemoglu, Simon Johnson, dhe James A. Robinson, duke qenë se përparimi i vendit tonë në vitet e fundit ka treguar pikërisht se forcimi i institucioneve demokratike mund të sjellë përfitime ekonomike.
Ajo që e bën vendin tonë shembull të duhur për shkencëtarët të socialë, u shpreh kryeministri, është fakti se vendi ynë nxjerr në pah lidhjen kauzale me të cilën përpjekjet për demokratizim mund të çojnë në përfitime ekonomike.
“Së pari, kompanitë e huaja janë më të gatshme që të investojnë në një vend ku nuk detyrohen të paguajnë mito për zyrtarë publikë në mënyrë që të futen në tregun vendas. Së dyti, qytetarët dhe bizneset janë më të gatshme që të paguajnë taksat kur e dinë që paratë e tyre do të shpenzohen me përgjegjësi nga shteti, në vend se të mbushin xhepat e politikanëve të korruptuar dhe të afërmve të tyre. Dhe së treti, kur njerëzit janë optimistë për drejtimin e qeverisë dhe të vendit, ata janë të prirur të shpenzojnë në vend se të kursejnë. Në të tri këto rrafshe, reformat tona kanë ndihmuar shtytjen përpara të progresit tonë ekonomik”, u shpreh kryeministri Kurti.
Përveç këtyre tre faktorëve, kryeministri veçoi edhe një faktor të katër në rastin e Kosovës: socialdemokracinë.
“Për ne, një shoqëri njëmend demokratike nuk është vetëm një shoqëri që përdorë procedurat e vendimmarrjes me shumicë e pa ndikime korruptive; një shoqëri demokratike është edhe ajo që siguron një shpërndarje të gjerë të mundësive dhe burimeve shoqërore mes qytetarëve, si anëtarë plotësisht të barabartë të shoqërisë”, tha kryeministri Kurti.
Me këtë rast, ai përmendi politikat, masat dhe programet përmes së cilave është ndarë dhe rishpërndarë rritja ekonomike te qytetarët sikurse janë; shtesat për lehona dhe fëmijë, arsimi publik falas, bursat studimore për studente vajza dhe gra dhe studentë nga radhët e komuniteteve joshumicë, investimet në efiçiencë të energjisë, rritja e pagave në sektorin publik dhe e pensioneve, rritja e pagës minimale, masat e punësimit për të rinj, investimet në shëndetësi dhe shërbime publike, dhe mundësitë dhe mbështetja e qeverisë që diaspora të mund të investojë në Kosovë.
Pas adresimit, kryeministri Kurti iu përgjigj pyetjeve të ngritura nga studentë, teksa i falënderoi përzemërsisht për mundësinë për të bashkëbiseduar dhe për mikpritjen e ngrohtë. /Kosovatimes/
