I njohur si “Nostradamus” për aftësinë e tij për të parashikuar me saktësi rezultatin e zgjedhjeve presidenciale në SHBA që nga viti 1984, profesori dhe historiani Allan Lichtman ka gabuar vetëm një herë – kur republikani George W. Bush mposhti me vështirësi demokratin Al Gore në vitin 2000.
Demokratja Kamala Harris do të fitojë zgjedhjet presidenciale në SHBA këtë nëntor, parashikoi Lichtman.
“Kamala Harris do të jetë presidentja e ardhshme e Shteteve të Bashkuara të Amerikës – të paktën ky është parashikimi im për rezultatin e këtyre zgjedhjeve”, tha 77-vjeçari për The New York Times.
Lichtman ishte gjithashtu ndër ata që këshilluan demokratët të lejonin presidentin aktual Joe Biden të kandidonte, edhe pas një debati të dobët me republikanin Donald Trump.
Nuk ndjek opinionin publik
Ky historian amerikan nuk merr parasysh sondazhet e opinionit publik në parashikimet e tij – ai mbështetet ekskluzivisht në 13 pyetje që lidhen me partinë që aktualisht mban Shtëpinë e Bardhë, të cilave ai përgjigjet “po” ose “jo”. Një kandidat që mbron mandatin është një nga faktorët që jep përparësi sipas Lichtman.
Megjithatë, Lichtman pretendon se Harris tashmë ka dorën e sipërme në tetë nga 13 kriteret që ai ndjek. Ndër të tjera, mungesa e një kandidati të rëndësishëm të palës së tretë pas daljes në pension të Robert F. Kennedy Jr., tregues pozitivë ekonomikë në afat të shkurtër dhe afatgjatë, disa suksese legjislative të administratës demokrate dhe mungesa e trazirave të mëdha sociale ose skandalet që lidhen me Shtëpinë e Bardhë favorizojnë ndër të tjera demokratët.
