Shkruan: Hyzri SALIHU
-Shqiptarët ngado që janë në trojet e tyre apo të inkuadruar kudo nëpër botë, nuk kanë bërë e nuk kanë të bëjnë me këtë formë të re lufte shkatërruese në zhdukjen e njerëzimit.
Shqiptarët asnjëherë nuk kanë qenë e nuk kanë për të qenë terroristë.
Terroristë kanë qenë ata që kanë sulmuar e masakruar në shekuj shqiptarët.
Terroristë janë ata që masakruan shqiptarët në luftën e Parë dhe të Dytë Botërore.
Terroristë janë ata që larguan shqiptarët nga trojet etnike duke i degdisur në Turqi, Evropën Perëndimore, në Amerikë e deri në Australinë e largët.
Terroristët janë e do të mbeten të tillë ata që kryen masakrën e paparë të vitit 1998 dhe 1999, ku në mënyrë të dhunshme vranë, prenë, torturuan dhe përdhunuan shqiptarët, duke u marrë me forcë pasuritë e duke i zbuar nga shtëpitë e tyre.
Siguria Kombëtare e konsideron terrorizmin si një rrezik të madh ndërkombëtar dhe nëpërmjet këtij përcaktimi, ajo i bashkëngjitet çdo force progresiste ndërkombëtare, në luftën të ashpër e të pandërprerë për të luftuar deri në fund këtë rrezik kërcënues për të gjithë njerëzimin.
Në këtë këndvështrim, brenda këtij rreziku shihet edhe mundësia e destabilizimit të brendshëm të shqiptarëve brenda dhe jashtë Shqipërisë.
Ky lloj destabilizimi nuk vjen dhe nuk ka për të ardhur nga shqiptarët, por nga veprimtaria e ethshme e agjentëve të Beogradit, Shkupit, Athinës dhe të pasuesve të tyre të dukshëm e të padukshëm.
Ata veprojnë nën maskën e pranisë së krimit dhe të grupeve kriminale, të cilët në të vërtetë duke vetëvepruar po fajësojnë vetveten.
