Të paktën nëntë njerëz vdiqën pas shpërthimit të vullkanit Lewotobi Laki-Laki në Indonezinë lindore, raporton Reuters.
Vullkani Laki-Laki, i vendosur në ishullin Flores, shpërtheu të dielën në orën 23:57 me orën lokale, duke nxjerrë lavë të kuqe të zjarrtë, hi vullkanik dhe shkëmbinj të nxehtë. Autoritetet në Indonezi e ngritën statusin e rrezikut të vullkanit në nivelin më të lartë.
“Pas shpërthimit pati edhe një ndërprerje të energjisë elektrike. Më pas ra shi i shoqëruar nga vetëtima e fortë, e cila shkaktoi panik të madh tek njerëzit që ndodhen pranë vullkanit”, tha për Reuters Hadi Wijaya, zëdhënës i Qendrës për Vullkanologjinë atje.
Shpërthimi i vullkanit ka prekur shtatë fshatra aty pranë, banorët e të cilëve janë evakuuar, por nëntë prej tyre kanë humbur jetën, sipas informacioneve aktuale. Lava e zjarrtë dhe gurë të nxehtë goditën fshatrat që janë deri në katër kilometra larg kraterit.
Fshatrat më afër malit Lewotobi janë plotësisht të mbuluara me hi vullkanik dhe autoritetet vendosën më pas të evakuojnë banorët e fshatrave që janë dhjetë ose më shumë kilometra larg kraterit.
