Kryeministri i Kosovës, Albin Kurti, mori pjesë në ceremoninë e organizuar nga Fondacioni Jahjaga, me temën “Avancimi i Rolit të Gruas, Paqes dhe Sigurisë”, që u mbajt në Prishtinë.
Në adresimin e tij, kryeministri Kurti tha se shënimi 25-vjetorit të përfundimit të luftës dhe çlirimit këtë vit ishte përplot me ngjarje reflektimi dhe frymëzimi.
Kurti tha se derisa punojnë për të ardhmen, është thelbësore të kujtohet e kaluara.
“Rrëfimet e të mbijetuarave të dhunës seksuale gjatë luftës në Kosovë, dëshmojnë se të gjitha plagët kërkojnë edhe kujdes shoqëror edhe drejtësi shtetërore. Na përkujtojnë se mbështetja ndaj të mbijetuarave është obligim e detyrë e përbashkët, që kërkon përkushtim të përhershëm. Zëri i tyre është thelbësor në proceset tona të drejtësisë tranzicionale, që njohin dhembjen e së kaluarës dhe inkurajojnë për shpresë drejtë së ardhmes”, u shpreh kryeministri.
Tutje, kreu qeveritar foli për Strategjinë për Drejtësi Tranzicionale e miratuar për herë të parë pas përfundimit të luftës në Kosovë. Tha se ka filluar dokumentimi i krimeve të kryera gjatë luftës dhe qeveria po mbështet aplikimin e të mbijetuarave në Komisionin Qeveritar për Njohjen dhe Verifikimin e Statusit të Viktimave të Dhunës Seksuale gjatë Luftës, duke financuar organizatat e autorizuara.
Kurti tha se derisa shënojnë 25 vjet liri e paqe, kujtojnë të gjitha viktimat dhe të mbijetuarat, dhe nderojnë qëndresën e grave dhe të vajzave pa dallim, që siç tha mbi shkatërrimin e luftës, po ndërtojnë paqen e tashme dhe të së ardhmes.
Kryeministri theksoi përkushtimin e Qeverisë që gratë dhe vajzat, nga çdo komunitet, të kenë të njëjtat mundësi dhe mbështetje dhe tha se agjenda për barazi, përtej së qeni një premtim i së ardhmes, është angazhim i tyre i përditshëm.
“Kështu duke punuar bashkë për të tashmen, po i ngrisim të fortë e të qëndrueshëm themelet e barazisë mes individëve e të paqes midis popujve, që t’ua lëmë trashëgimi brezave të ardhshëm”, tha thënë ai. /Kosovatimes/
