Organizatat anëtare të Rrjetit për të Drejtat e Njeriut kanë reaguar lidhur me mënyrën e trajtimit të një rasti të dhunës në familje në një ‘reality show’ televiziv.
Rrjetit për të Drejtat e Njeriut që përfshin organizatat si; Nisma e të Rinjve për të Drejtat e Njeriut (YIHR KS), Shoqata e Paraplegjikëve dhe Paralizës së Fëmijëve të Kosovës (HANDIKOS), Qendra për Barazi dhe Liri (CEL Kosova), Instituti i Kosovës për Drejtësi (IKD), Qendra Kosovare për Studime Gjinore (QKSGJ), Zëri i Romëve, Ashkalive dhe Egjiptianëve (VORAE) dhe Iniciativa e Re Sociale (NSI) përmes një komunikate kanë thënë se kanë pranuar me shqetësim të thellë veprimet e televizionit “Klan Kosova”, për siç kanë thënë, mënyrën se si ky televizion e trajton një rast të dhunës në familje në një reality show.
“Në një situatë të papranueshme, produksioni i emisionit “Big Brother Vip Kosova 3” në këtë televizion ka vendosur të përfshijë në grupin e banorëve një burrë i cili është i dyshuar se ka ushtruar dhunë ndaj ish-bashkëshortes së tij, e cila është gjithashtu pjesëmarrëse në këtë program. Ky veprim përbën një injorim flagrant të ndjeshmërisë ndaj viktimave të dhunës sidomos në një periudhë kur gratë po ballafaqohen me dhunë sistematike. Është e pakuptimtë dhe në kundërshtim me parimet e drejtësisë që një media të vendosë në të njëjtin ambient të dyshuarin për ushtrim të dhunës në familje dhe viktimën e dhunës në familje, kur një rast është në procedurë gjyqësore”, thuhet në reagim.
Kjo qasje, sipas Rrjetit për të Drejtat e Njeriut, është një precedent i rrezikshëm dhe ritraumatizim i mijëra viktimave të dhunës në familje që mund të shohin dhe përjetojnë skena të tilla në një medium me frekuenca kombëtare, i cili përcillet nga një audiencë kaq e gjerë në Kosovë dhe më tej. Për më tepër, sipas këtyre organizatave, një veprim i tillë dekurajon viktimat e dhunës në familje të raportojnë rastet dhe të flasin publikisht për to.
“Nga pikëpamja etike dhe ligjore, prodhimi i një përmbajtjeje të tillë në një media kombëtare është shqetësues. Klan Kosova dhe produksioni i “Big Brother” duhej të kishin marrë parasysh standardet profesionale dhe etike, të cilat kërkojnë që rastet e dhunës dhe abuzimit të trajtohen me ndjeshmëri dhe përgjegjësi. Për më tepër, ky veprim bie ndesh me angazhimet që kanë ndërmarrë institucionet tona dhe shoqëria civile për të mbrojtur dhe promovuar të drejtat e grave dhe për të parandaluar dhunën në familje dhe dhunën në baza gjinore. Ftojmë Klan Kosovën që menjëherë të largojë dhunuesin nga ky program dhe të kërkojë falje publike për shqetësimin që u ka shkaktuar secilës viktimë të dhunës në familje dhe publikut në Kosovë”, thuhet tutje në reagim.
Ndaj asaj që ka ndodhur në këtë reality show ka reaguar edhe Qendra për Informim, Kritikë dhe Aksion (QIKA), e cila ka kërkuar mbylljen e menjëhershme të ‘Big Brother VIP”.
“Big Brother VIP Kosova duhet të mbyllet menjëherë! Ky program promovon shembuj të përsëritur të dhunës, ngacmimeve seksuale e diskutimeve skajshmërisht seksiste dhe homofobike. Mbrëmë, publiku u trondit kur produksioni futi në shtëpi një person të denoncuar për dhunë ndaj gruas. Klan Kosova në shërbim të spektaklit e klikimeve i vendosi nën një kulm viktimën dhe dhunuesin. Kjo është e papranueshme dhe nuk do të tolerohet. Ky vendim jo vetëm që shkel të drejtat e viktimës, por normalizon dhunën ndaj grave. Ftojmë Komisionin e Pavarur të Mediave të ndërmarrin masa urgjente për të ndaluar transmetimin televiziv të këtij programi”, thekson QIKA në reagim. /Kosovatimes/
