Një memorandum bashkëpunimi është nënshkruar mes Fakultetit të Inxhinierisë Mekanike e atij të Shkencave të Aplikuara të Flensburgut nga Gjermania, duke marrë shembull inovacionet që i solli botës gjiganti automobilistik “Mercedes Benz”.
Kjo u bë e ditur nga UP-ja që treguan se marrëveshja u nënshkrua mes rektorit Arben Hajrullau e presidenti i Universitetit të Shkencave të Aplikuara të Flensburgut nga Gjermania, Sven Tode.
Ky memorandum u bë për të lehtësuar e përmirësuar bashkëpunimin akademik në fushën e trajnimit, hulumtimit, zhvillimit të kurrikulave, arsimit postdiplomik, sigurisë së cilësisë dhe shkëmbimit të studentëve, stafit akademik dhe administrativ.
Kësaj marrëveshje i parapriu një ligjëratë e mbajtur nga Tode i cili ka shpjeguar mënyrat më të efektshme se si mund të bëhen projektet inovative në vendet e zhvilluara dhe ato në zhvillim, aty ku u prezantua edhe një projekt-propozim inovativ për industrinë automobilistike, i realizuar nga bashkëpunimi mes UP-së e Universitetit të Shkencave të Aplikuara të Flensburgut nga Gjermania.
Në njoftimin e shpërndarë nga UP-ja thuhet se për ta është shumë e rëndësishme lidhja e ekonomisë private dhe tregut të punës me shkollimin dhe punësimin e studentëve.
