Partia Demokratike e Kosovës e ka dërguar në Gjykatën Kushtetuese Ligjin për Zyrtarët Publikë. Një hap të tillë sot, gjatë ditës, e ka bërë edhe Lidhja Demokratike e Kosovës.
Shefi i Grupit Parlamentar të PDK-së, Abelard Tahiri përmes një postimi në Facebook, bëri të ditur se sot e kanë dërguar në Gjykatën Kushtetuese ligjin që shumica parlamentare e miratoi javën e kaluar dhe me të cilin ndryshohet dhe plotësohet Ligji në fuqi për Zyrtarët Publik.
“Sikurse, këtë të fundit, kur dy vite më parë e dërguam në gjykatë, ashtu edhe tani ndryshim-plotësimin e tij, e kemi dërguar për të pamundësuar politizimin e partizimin e administratës publike dhe për të parandaluar degradimin e sistemit të meritokracisë, karrierës dhe pavarësisë së administratës, detyrë e të cilës është ti shërbej me zell e profesionalizëm të gjithë qytetarëve pa dallim, e mos të kthehet si instrument politik i pushtetit”, shkruan Tahiri.
Tutje Tahiri thotë se kjo, administratë e këta zyrtarë publikë, janë investim afatgjatë i shtetit dhe i partnerëve tanë dhe nuk do të lejojmë që ti nënshtrohen presioneve e agjendave politike.
“Aktgjykimi i Gjykatës Kushtetuese i verës së vitit 2023, i konfirmoi në tërësi pretendimet tona, ndërsa Kuvendi me këtë rast, ishte i obliguar që brenda gjashtë muajsh ti adresoj të gjitha shkeljet. Sot, rreth një vit e gjysmë pas, jo vetëm që dështuan ta përgatisin më kohë ligjin e ri, por akoma më keq, i përsëritën një pjesë të shkeljeve në të njëjtën mënyrë”, shkruan tutje Tahiri.
Kontestimi i këtij ligji në Gjykatën Kushtetuese, sipas PDK-së, nuk është rastësi dhe paraqet, njëkohësisht, edhe një dëshmi të angazhimit konsistent për mbrojtjen e vlerave dhe rendit kushtetues.
Në Kushtetuese kanë përfunduar sot ndryshimet në Ligjin për Zyrtarët Publikë që u bënë më 30 tetor të këtij viti në Kuvendin e Kosovës. Këto plotësim-ndryshime i dërguan në Gjykatën Kushtetuese Armend Zemaj e Shkëmb Manaj, të LDK-së.
