Drejtori i Përgjithshëm i kompanisë Meta, që zotëron rrjetet sociale Facebook dhe Instagram, Mark Zuckerberg, ka uruar Trumpin për fitoren dhe ka vlerësuar se SHBA-të kanë mundësi të mëdha. Ai shprehu gatishmërinë e tij për të punuar me presidentin e ri dhe administratën e tij.
Urime ka dërguar edhe themeluesi i kompanisë Amazon, Jeff Bezos, pronar i një prej gazetave më me ndikim amerikan, Washington Post, i cili para zgjedhjeve nuk ka mbështetur asnjë kandidat të vetëm për president, gjë që ishte praktikë më parë. Në zgjedhjet e mëparshme kjo mbështetje ishte për kandidatin e Partisë Demokratike.
“Urime të mëdha për presidentin tonë të 45-të dhe tani të 47-të për një rikthim të jashtëzakonshëm politik dhe fitoren përfundimtare. Asnjë vend nuk ka mundësi më të mëdha. I uroj Donald Trump-it sukses të plotë në udhëheqjen dhe bashkimin e Amerikës që duam,” tha Bezos.
Së bashku me urimet, CEO i Apple Tim Cook shprehu gjithashtu gatishmërinë e tij për të punuar me Trump dhe administratën e tij për të “siguruar që Amerika të udhëhiqet dhe të fuqizohet nga zgjuarsia, inovacioni dhe kreativiteti”.
Krijuesi i mjetit më të famshëm të inteligjencës artificiale në botë, ChatGPT, Sam Altman, ka dërguar një mesazh të shkurtër urimi, duke i uruar suksese të mëdha Trump.
CEO i Microsoft, Satya Nadella theksoi gatishmërinë e tij për t’u angazhuar me presidentin e ri dhe administratën e tij për të “lançuar inovacione që krijojnë rritje dhe mundësi të reja për SHBA-në dhe botën”.
