NUMRI i personave mbi 100 vjeç në Itali është rritur me 30 për qind në dhjetë vitet e fundit, ndërkohë që lindshmëria ka vazhduar të bjerë. Më shumë se 22,000 italianë janë në grupmoshën midis 100 dhe 104 vjeç këtë vit, nga pak më shumë se 17,000 në 2014, sipas një raporti nga zyra shtetërore e statistikave ISTAT të enjten. Shumica dërrmuese e tyre, 81 për qind, janë gra.
Deri më tani, në vitin 2024, ka pasur 21 superqindvjeçarë – njerëz të moshës 110 e lart, nga të cilët vetëm një është burrë. Ky është më shumë se dyfishi i numrit të vitit 2009, kur ishin vetëm 10.
Nataliteti ndër më të ulëtat në Evropë
Plakja graduale e popullsisë i krijon probleme Italisë, ku lindshmëria është ndër më të ulëtat në Evropë, sepse ka një ndikim të madh në buxhetin e shtetit për shkak të fondit të madh për pensionet dhe kujdesin shëndetësor.
Personi më i vjetër në Itali është një grua 114-vjeçare, ndërsa mes meshkujve më i moshuari është 110 vjeç, njoftoi ISTAT.
