DONALD Trump premtoi gjatë fushatës së tij se do të vendoste taksa për të gjitha mallrat e importuara në SHBA nëse fitonte përsëri Shtëpinë e Bardhë. Pas fitores së tij, kompanitë dhe ekonomistët në mbarë botën po përpiqen me nxitim të vlerësojnë se sa serioz është ai.
Në të kaluarën, Trump ka vënë në shënjestër vende individuale, si Kina, ose industri të veçanta, si çeliku, me tarifa.
Megjithatë, premtimi i tij i fushatës për të vendosur një taksë 10% deri në 20% për të gjitha mallrat e huaja mund të ndikojë në çmimet në mbarë botën.
“Evropianët do të duhet të paguajnë një çmim të madh”
Muajin e kaluar ai përmendi veçanërisht Evropën.
“Bashkimi Evropian tingëllon kaq bukur, kaq i mrekullueshëm, apo jo? Të gjitha këto vende të vogla evropiane duke u bashkuar… Ata nuk i marrin makinat tona. Ata nuk i marrin produktet tona bujqësore,” tha ai.
“Ata shesin miliona e miliona makina në Shtetet e Bashkuara. Jo, jo, jo, ata do të duhet të paguajnë një çmim të madh.”
Aksionet e BMW, Mercedes dhe Volkswagen ranë midis 5% dhe 7% pas konfirmimit të fitores së Trump. SHBA është tregu më i madh i eksportit për prodhuesit gjermanë të makinave.
Gjatë fushatës, Trump tha se tarifat ishin zgjidhja për një sërë problemesh, duke përfshirë goditjen ndaj Kinës dhe parandalimin e emigracionit të paligjshëm.
