Seancë të jashtëzakonshme kishte paraparë Kuvendi Komunal i Gjilanit ku do të diskutohej për bartjen e buxhetit dhe miratimin e buxhetit për vitin e ardhshëm, por mungesa e kuorumit bëri që seanca to mos arrinte të mbahej fare.
Ky takim i jashtëzakonshëm i kuvendarëve gjilanas që u thirr nga kryetari Alban Hyseni u bojkotua nga partitë opozitare të kësaj komune, LDK-ja e PDK-ja, që nuk ishin fare në sallë.
Kryesuesi Kushtrim Kadriu tha se me vetëm 14 asamblistë të pranishëm nuk ka kuorum për të filluar seancën, derisa thirrësi i saj, kryetari Alban Hyseni tha se kjo bllokadë qytetarëve u kushton me humbje gati 5 milionëshe.
“Po vërtetohet për muaj me radhë se mungon vullneti nga opozita për të aprovuar buxhetin për vitin 2025, dhe përpos kësaj, ka munguar vullneti edhe për aprovimin e tejkalimit të buxhetit, që nënkupton mos humbjen e mjeteve në fund të vitit. Kjo bllokadë e shkaktuar në Kuvend, qytetarëve u kushton me rreth 5 milionë euro, mjete të cilat do të humbin në vitin 2025”, ka thënë Hyseni, duke shtuar se kjo nuk është seanca e fundit e jashtëzakonshme që e ftojnë”, citon komunikata e Zyrës për Media të Komunës, kryetarin Hyseni.
Asamblistët nga pozita Ismajl Kurteshi dhe Krenare Latifi Kqiku, këtë e kanë quajtur dëmtim të qytetarëve të Gjilanit.
