Drejtoresha e Muzeut të Mitrovicës, Nora Prekazi ka thënë se institucioni që drejton është duke shkuar hap me kohën, duke rikonceptuar mënyrën e të funksionuarit.
Prekazi, ka thënë se Muzau ka hapsirë të kufizuar, por i kanë mirëpritur të gjitha ata që kanë zhvilluar aktivitete aty.
“Muzeu jonë gjithë këtë periudhë por sidomos së fundmi është munduar që të përcjell se çka është muzeologjia në botë. E që muzeologji në botë është në një zhvillim, në rikonceptim që nuk është vetëm një ekspozitë, por është edhe një hapësirë ku zhvillohet aktiviteti kulturor me gjithë përfshirje. Me qenë se ne e kemi një hapësirë të kufizuar edhe me këtë që e kemi jemi munduar që t’i japim hapësirë se cilit”, ka theksuar drejtoresha Prekazi.
Prekazi për RTK-në ka folur edhe për risit që i ka arritur kohëve të fundit ky muze.
“Vitin 2024 e kemi paraparë që të jetë viti i gjithëpërfshirjes. Pavarësisht aktivitetit të larmishëm që e kemi pasur këto vite, sivjet kemi risi tjera. Tash do të kemi historikun dhe narrativat muzeale në gjuhën e shenjave që shpjegohet historiku dhe narrativat në tri gjuhë“, ka theksuar ajo.
Sipas saj, sektori i arkeologjisë është njëri ndër më të rëndësishmit në këtë Muze. Ajo ka thënë se ky muze është një destinacion i rëndësishëm për të gjithë ata që duan të njohin më mirë historinë dhe kulturën e Mitrovicës dhe për të gjithë studiuesit dhe vizitorët e interesuar.
Muzeu i Mitrovicës, i themeluar në vitin 1952, është një institucion i rëndësishëm kulturor dhe historik për qytetin dhe rajonin. Muzeu mbledh dhe paraqet një pasuri të madhe të trashëgimisë materiale dhe shpirtërore të kësaj zone.
