PRESIDENTI i Koresë së Jugut ka kërkuar falje për një sërë skandalesh të lidhura me gruan e tij, duke përfshirë pranimin e pretenduar të një çantë dore luksoze Dior dhe manipulimin e aksioneve.
Duke iu drejtuar kombit në televizion, Yoon Suk-yeol pranoi se gruaja e tij Kim Keon-hee duhej të ishte sjellë më mirë, por theksoi se disa nga akuzat ndaj saj ishin “të ekzagjeruara”. Presidenti njoftoi se do të krijonte një zyrë për të mbikëqyrur detyrat zyrtare të zonjës së parë, por refuzoi një thirrje për të hetuar aktivitetet e saj.
Kërkimi i faljes së Yoon vjen ndërsa ai përpiqet të ndryshojë trendin rënës të popullaritetit të tij në publikun e Koresë së Jugut, shkruan BBC .
Ndarje edhe brenda partisë së presidentit
Në fund të vitit 2023, kanali i majtë në YouTube, Voice of Seoul, publikoi një video nga shtatori i vitit 2022, ku supozohet se Kim pranonte një çantë Dior me vlerë 3 milionë won (2,000 euro) nga një pastor i cili e filmoi të gjithën duke përdorur një kamerë të fshehur në orën e tij.
Yoon tha në shkurt se video u zbulua si një “manovër politike” dhe nuk ka kërkuar falje. Partia Demokratike e Koresë së Jugut, opozita e Partisë konservatore të Fuqisë Popullore të Yoon, tha në atë kohë se një qëndrim i tillë ishte “i paturpshëm dhe i pashpresë”. Partia opozitare ka akuzuar gjithashtu prej kohësh zonjën e parë se është përfshirë në manipulimin e çmimeve të aksioneve.
Në fillim të këtij viti, Yoon vuri veton ndaj një projektligji që do të kërkonte që gruaja e tij të hetohej mbi akuzat. Skandali ka shkaktuar gjithashtu përçarje brenda partisë së Yoon, me një lider që e krahason Kim me Marie Antoinette, mbretëreshën franceze e njohur për stilin e saj ekstravagant të jetesës.
