Pas pasojave katastrofale nga vërshimet në Valencia të Spanjës, përveç njerëzve kanë pësuar edhe kafshët shtëpiake. Ato që kanë mbijetuar por kanë humbur familjet e tyre, po birësohen nga njerëzit zemërmirë.
Nëntë ditë pas përmbytjeve, kafshët shtëpiake të humbura vazhdojnë të shfaqen në Valencia, të rrëmbyera nga forca e ujit. Disa nga pronarët e tyre janë zhdukur dhe të tjerë nuk e dinë nëse kafsha e tyre ka shpëtuar. Ka familje që tashmë kanë filluar t’i adoptojnë këto kafshë pa familje.
Në Paiporta nuk ka klinika veterinare, ndaj është ngritur një spital i improvizuar në një përdhesë të shkatërruar, të siguruar nga fqinjët. Në fushën e futbollit, ata i marrin kafshët e humbura për të gjetur pronarët e tyre nëse është e mundur, u bëjnë një kontroll veterinar dhe nëse profilet e tyre janë të përshtatshme, ata shkojnë në një shtëpi kujdesi ose birësohen. Jo vetëm kafshët shtëpiake, por edhe kafshët e fermës sillen në fushën e futbollit.
Kafshët kanë pasoja fizike dhe psikologjike. Deri më tani, 400 kafshë kanë gjetur shtëpi të reja, 300 prej tyre qen. /REL/
