Ekipi i tranzicionit i presidentit të sapozgjedhur të SHBA-së, Donald Trump, ka njoftuar se keshilltari republikan, i cili prezantoi konturet e mundshme të planit të paqes për Ukrainën me mbështetjen e SHBA-së, nuk foli në emër të presidentit të sapozgjedhur.
Bryan Lanza, një strateg i vjetër i Partisë Republikane, i tha BBC-së se administrata Trump do t’i kërkonte presidentit ukrainas Volodymyr Zelensky për një “vizion realist për paqen”.
Ai deklaroi se prioriteti i administratës së re amerikane në Ukrainë do të jetë vendosja e paqes, jo kthimi i territorit të humbur ukrainas, përfshirë Krimenë. “Nëse presidenti Zelensky vjen në tryezë dhe thotë se ne mund të kemi paqe vetëm nëse kthejmë Krimenë, ai do të na tregojë se nuk është serioz. Krimea është e humbur,” tha ai.
“Ai nuk punon për Trumpin, ai nuk flet për të”
Një zëdhënës i ekipit të tranzicionit të Trump mohoi se Lanza po fliste në emër të Trump. Ekipi i tij i tranzicionit aktualisht po shqyrton kandidatët për poste administrate dhe po zhvillon politika që Trump mund të miratojë gjatë mandatit të tij të dytë.
“Bryan Lanza ishte një kontraktor për fushatën,” tha zëdhënësi anonim. “Ai nuk punon për Presidentin Trump dhe nuk flet për atë”, shtoi ai.
Gjatë fushatës zgjedhore, Trump tha se do të gjente një zgjidhje për t’i dhënë fund luftës “brenda një dite”, por nuk shpjegoi se si do ta bënte atë.
Sipas raportimeve të mediave, Zelensky dhe Trump folën me telefon këtë javë, pas zgjedhjeve në SHBA, dhe mbështetësi i Trump, miliarderi Elon Musk, iu bashkua bisedës. Trump më parë ka refuzuar të përjashtojë mundësinë e dhënies së territorit ukrainas Rusisë dhe ka qenë i paqartë në deklaratat e tij për konfliktin.
Disa nga aleatët e tij të shquar kanë paraqitur propozime paqeje që do të rezultonin efektivisht në kontroll afatgjatë rus mbi zonat e njohura ndërkombëtarisht si territor ukrainas.
Rusia aneksoi gadishullin e Krimesë në vitin 2014. Më shumë se dy vjet e gjysmë pas fillimit të një pushtimi të plotë të Ukrainës, forcat ruse kontrollojnë pak më pak se 20 për qind të territorit ukrainas. Zelensky ka deklaruar vazhdimisht se paqja nuk mund të vendoset për sa kohë që forcat ruse janë të pranishme në Ukrainë dhe derisa ata të kthejnë të gjithë territorin aktualisht nën kontrollin rus, përfshirë Krimenë.
“Plani i tij i fitores”, i zbuluar muajin e kaluar, përfshin këtë kërkesë, si dhe një thirrje që Ukraina të bashkohet me NATO-n, të cilën Rusia e kundërshton. Presidenti rus Vladimir Putin tha në qershor se kushtet për bisedimet e paqes përfshinin heqjen dorë nga Ukraina nga katër rajone të aneksuara nga Moska edhe pse ajo nuk i kontrollon plotësisht ato.
