DONALD Trump është gati të ushtrojë presion ndaj Ukrainës për të rënë dakord për një marrëveshje armëpushimi për t’i provuar publikut amerikan se ai mund t’i përmbushë premtimet e tij, ka thënë një analist ushtarak dhe ish-këshilltar ushtarak amerikan.
Kujtojmë se Trump premtoi gjatë fushatës zgjedhore se do t’i jepte fund luftës në Ukrainë nëse do të kthehej në Shtëpinë e Bardhë, por nuk shpjegoi se si do ta arrinte këtë.
Mark Voyger, ish-këshilltar special për çështjet ruse dhe euroaziatike i gjeneralit komandues të ushtrisë amerikane në Evropë, i tha Sky News se Trump ka të ngjarë të kërkojë “paqe për hir të paqes”.
“Unë mendoj se ai do të ishte i gatshëm të ushtronte presion mbi Ukrainën për të arritur paqen – jo për hir të drejtësisë dhe jo për hir të rivendosjes së sovranitetit ukrainas dhe ndëshkimit të agresionit rus, por paqes për hir të paqes, në mënyrë që ai mund të përmbushte atë që premtoi në bazën e tij elektorale”, tha ai.
“Trump nuk ka fuqi për të ushtruar presion ndaj Putinit”
“Çdo marrëveshje e propozuar kur Trump të kthehet në detyrë ka të ngjarë të vijë si rezultat i presionit ndaj Ukrainës duke kërcënuar se do të ndalojë ndihmën jetike,” tha Voyger, duke shtuar se Trump “nuk ka asnjë levë për të ndikuar në sjelljen e Putinit”.
Kur u pyet nëse ai mendonte se presidenca e ardhshme e Trump ishte e dëmshme për fatin e Ukrainës, Voyger tha po.
“Trump do të jetë më i prirur për të bashkëpunuar me autokratë,” tha ai. “Ai ka instinktet autokratike. Ai është një izolacionist. Një sjellje e tillë do të dëmtonte NATO-n, solidaritetin transatlantik dhe në fund të fundit kërcënonte shtyllat e rendit ndërkombëtar siç e njohim ne,” tha ai.
