Kryeministri i Kosovës, Albin Kurti, priti në takim përfaqësues nga organizata `Qatar Charity`. Delegacioni u kryesua nga Drejtori Ekzekutiv, Yousuf Al Kuwari, ambasadori i Shtetit të Katarit në Shqipëri dhe ambasadori jorezident për Kosovë, Jabor Ali Hussein Al Dosari. Në takim u diskutua për mundësitë konkrete për investime, me theks të veçantë në shërbimet shëndetësore.
Sipas njoftimit nga ekzekutivi, kryeministri Kurti i falënderoi ata për mbështetjen e vazhdueshme që Kosova ka marrë nga fondacionet e shtetit të Katarit për zbatimin e shumë projekteve.
“Përfaqësuesit e organizatës ‘Qatar Charity’ shprehën vullnetin e tyre për vazhdimin e bashkëpunimit dhe konkretizimin e projekteve me rëndësi të dyanshme.U theksua qëllimi i përbashkët për thellimin e bashkëpunimit ekonomik, duke veçuar potencialin e madh që ofron Kosova në shumë fusha, si ajo e teknologjisë së informacionit, energjisë, minierave dhe pasurive nëntokësore të Kosovës”, thuhet në njoftim .
Sot do të përurohet dhe objekti i ri i Urgjencës në Komunën e Podujevës, që është rezultat i një pune të përbashkët dhe bashkëfinancimit të komunës dhe organizatës Qatar Charity, me një investim total prej 1.7 milionë euro, prej të cilave komuna ka kontribuar me 600 mijë euro kurse organizata me 1.1 milionë. Në këtë ngjarje do të marrë pjesë kryeministri Kurti. /Kosovatimes/
