Anglia ka marrë hak për humbjen e muajit tetor në “Wembley” duke triumfuar bindshëm me rezultat 3-0 ndaj Greqisë në stadiumin Olimpik në Athinë.
Ndeshja e Grupit 2 në Ligën B të UEFA Nations League e zhvilluar të enjten ka parë “Tre Luanët” të dominonojnë për pjesën më të madhe të ndeshjes.
Anglezët kanë kaluar në epërsi që në minutën e shtatë, kur Ollie Watkins ka shënuar pas një aksioni të Noni Madueke, i cili ka dribluar deri në vijën e fundores dhe ka asistuar për sulmuesin e Aston Villës.
Pjesa e parë është karakterizuar nga kontrolli i lojës nga ana e Anglisë, por një moment rreziku nga Greqia për pak sa nuk ka sjellë barazimin. Kostas Tsimikas, i cili nuk ka shënuar që nga viti 2018, ka lëshuar një goditje të fortë drejt shtyllës së afërt, të cilën Jordan Pickford e ka mbrojtur me sukses.
Në pjesën e dytë, Anglia ka vazhduar kërkimin për golin e dytë për të vulosur fitoren.
Me afrimin e minutave të fundit, Jude Bellingham, në një aksion të drejtpërdrejtë, ka lëshuar një goditje nga jashtë zonës, duke qëlluar shtyllën e majtë. Topi është kthyer në portë nga shpina e portierit grek, Vlachodimos, duke e çuar rezultatin në 2-0 për Anglinë.
Më vonë, Morgan Gibbs-White ka asistuar për Curtis Jones, i cili e ka shënuar golin e tretë në debutimin e tij, duke vulosur fitoren për “Tre Luanët”.
Pas kësaj ndeshje, Anglia dhe Greqia ndajnë kryesimin e grupit me nga dymbëdhjetë pikë secila. Irlanda gjendet në vendin e tretë me gjashtë pikë, ndërsa Finlanda mban vendin e fundit pa asnjë pikë.
