Një burrë iranian i dënuar për përdhunimin e dhjetëra grave gjatë dy dekadave të fundit është ekzekutuar publikisht, njoftoi të mërkurën media shtetërore iraniane.
Gazeta shtetërore IRAN raportoi se Mohammad Ali Salamat u var pasi Gjykata e Lartë e Iranit la në fuqi dënimin me vdekje në fillim të tetorit. Ekzekutimi u bë në agim, në një varrezë në qytetin perëndimor të Hamedanit.
Salamat, 43-vjeçari pronar i një farmacie dhe palestre në Hamedan, është akuzuar nga rreth 200 gra për përdhunim dhe thuhet se i ka kryer këto krime gjatë 20 viteve të fundit. Sipas raporteve të mediave iraniane, në shumë raste Salamat dyshohet se i përdhunoi viktimat e tij pasi u kishte ofruar atyre martesë ose takim. Ai dyshohet se u ka dhënë disa grave pilula aborti, të cilat janë të ndaluara në Iran.
Salamat u arrestua nga policia në janar, gjë që çoi në protesta të mëdha para ndërtesës së organeve të drejtësisë në Hamedan, ku qindra qytetarë kërkuan dënimin me vdekje për të.
Ekspertët e Kombeve të Bashkuara theksuan në shtator se Irani është ndër vendet kryesore për sa i përket numrit të dënimeve me vdekje të ekzekutuara. Numri në rritje i ekzekutimeve në Iran ka shkaktuar reagime të forta nga organizatat e të drejtave të njeriut.
