Rrjeti i organizatave vendore për vëzhgimin e zgjedhjeve “Demokracia në Veprim”, ka dalë me vlerësim për periudhën siç e kanë quajtur ata, të parafushatës që po bëhet nga partitë politike.
Sipas këtij koalicioni organizatash ka një parafushatë intensive dhe tendencë të Qeverisë për të ndërhyrë në proces zgjedhor të cilën DnV-ja e ka quajtur si një nga problematikat më të mëdha të parafushatës.
“Një nga problematikat më të mëdha të parafushatës së deritanishme është përdorimi i burimeve publike për qëllime elektorale dhe ndërhyrjet e Qeverisë në procesin zgjedhor. Kjo përfshinë veprime që dëmtojnë barazinë e garës zgjedhore dhe mund të ndikojnë në përcaktimin e votuesve, duke krijuar një garë të pabarabartë. Ndër to, masat financiare, rritja e pensioneve, pagës minimale dhe pagave në sektorin publik, të miratuara nga Qeveria, që pritet të hyjnë në fuqi pak kohë para zgjedhjeve, shpërfaqin një model të rrezikshëm të përpjekjes për të ndikuar votuesit nëpërmjet fondeve publike”, tha Eugen Cakolli nga DnV.
Një tjetër shqetësim i ngritur nga DnV-ja në këtë konferencë ishte lidhur me procesin e votimit jashtë vendit.
“Deri tani, janë aprovuar rreth 15 mijë aplikime për votim jashtë vendit, ku dy të tretat e këtyre aplikimeve janë për votim me postë në misionet diplomatike të Kosovës. Megjithatë, DnV vëren se Ministria e Punëve të Jashtme dhe Diasporës ka tentuar të ndërhyjë në këtë proces duke kërkuar hapjen e qendrave të votimit në vende të tjera, gjë që është e paligjshme, pasi KQZ-ja është institucioni i vetëm që ka autoritetin për të organizuar dhe administruar zgjedhjet”, tha ai.
Gjatë këtij vlerësimi nga DnV-ja, u përmend se në KQZ ka mbizotëruar fryma konsensuale e vendimmarrjes dhe se ky institucion ka bërë progres të rëndësishëm duke digjitalizuar pjesën më të madhe të operacioneve zgjedhore.
Ky rrjet organizatash vendore ka bërë të ditur se monitorimin e fushatës zgjedhore 30 ditore do ta bëjnë Fushata zgjedhore 30 ditore 38 vëzhgues afatgjatë në të gjitha komunat e Kosovës, ndërsa gjatë në ditën e zgjedhjeve në terren në vëzhgim do t’i kenë 550 vëzhgues të tjerë afatshkurtër. /Kosovatimes/
