Në rajonin separatist të Gjeorgjisë, Abkhazi, prej disa ditësh po vazhdojnë protestat e mëdha të opozitës dhe qytetarëve, të cilat u përshkallëzuan sot me ndërhyrjen e demonstruesve në ndërtesën e parlamentit.
Përfaqësuesit e opozitës në Abkhazi, duke protestuar për ratifikimin e marrëveshjes ndërqeveritare Abhaziano-Ruse për realizimin e projekteve investuese nga persona juridikë rusë në territorin e Abkhazisë, përplasën makinat e tyre në gardhe metalike dhe hynë në ndërtesën e parlamentit.
Marrëveshja parashikon që investitorët rusë do të përjashtohen nga taksat doganore për materialet dhe pajisjet e ndërtimit të importuara për tetë vjet, si dhe nga taksat mbi pronën dhe të ardhurat e korporatave.
Norma e TVSH-së për investitorët do të jetë vetëm pesë për qind, gjysma e normës normale.
Për më tepër, qeveria e Abkhazisë është e detyruar t’u japë investitorëve, të cilët janë të regjistruar në një regjistër të veçantë, të drejta prioritare për furnizimin me energji dhe lidhjet me infrastrukturën dhe shërbimet komunale.
Investitorët kanë gjithashtu të drejtën e një hipoteke mbi tokën e dhënë nga qeveria e Abkhazisë si kolateral me bankën. Për rrjedhojë, nëse investitori dështon, banka mund të kërkojë këtë tokë publike.
Kundërshtarët pretendojnë se marrëveshja do t’i jepte një goditje fatale kompanive vendase, të cilat thjesht nuk mund të konkurrojnë me kompanitë ruse në kushte të tilla.
Për më tepër, ata e konsiderojnë atë një kërcënim për sigurinë e Abkhazisë.
Abkhazia ka qenë kryesisht nën kontrollin separatist që nga fundi i luftës në 1993. Gjeorgjia humbi kontrollin e pjesës tjetër të rajonit në një luftë të shkurtër me Rusinë në 2008.
Përveç Rusisë, vetëm katër vende e njohin Abkhazinë si të pavarur: Venezuela, Siria, Nikaragua dhe Nauru.
