Muhamed Krasniqi, ekspert i sigurisë rrugore, theksoi se Kosova ka shënuar progres të ndjeshëm në uljen e numrit të aksidenteve, përfshirë ato me fatalitet.
Megjithatë, sipas tij, statistikat tregojnë se 44% e aksidenteve fatale përfshijnë të rinjtë, duke prekur rëndë pjesën më vitale të shoqërisë.
“Humbja e një të dashuri për shkak të aksidenteve ka pasoja të mëdha emocionale dhe psikologjike për familjet e tyre. Shoqëria dhe institucionet duhet të jenë pranë këtyre familjeve, duke ofruar mbështetje dhe solidaritet,” theksoi Krasniqi për RTK.
Ai tha se është me rëndësi i ndërgjegjësimit të përgjithshëm për reduktimin e aksidenteve. “Në shumë raste kur jemi në rrugë, duhet ta kthejmë gishtin nga vetja. Ne jemi ata që shpesh kontribuojmë në shkaktimin e aksidenteve. Respektimi i shenjave rrugore, edhe kur ato nuk janë të vendosura në mënyrën më të mirë, është thelbësor për të ruajtur jetën,” tha Krasniqi.
Ndryshe për nder të Ditës Botërore të Përkujtimit të Viktimave në Aksidentet e Trafikut Rrugor, Asociacioni Kosovar i Motorizimit (AMRKS), si anëtar i rregullt i Federatës Evropiane të Viktimave të Rrugës (FEVR), organizoi një sërë aktivitetesh.
Tema kryesore e këtij viti ishte “Të rinjtë dhe siguria e tyre në rrugë”, me pjesëmarrjen e përfaqësuesve institucionalë dhe organizatave të shoqërisë civile. Aktivitetet e organizuara synojnë të nxisin vetëdijen dhe përgjegjësinë qytetare, duke përforcuar mesazhin për rëndësinë e respektimit të rregullave të qarkullimit rrugor.
