Partia “FJALA” ka rikujtuar se çështja e përfshirjes së edukatës seksuale në shkollat fillore të Kosovës ishte paralajmëruar nga kryetari i saj, Dr. Gëzim Kelmendi, katër vite më parë, më 15 prill 2020.
Në një deklaratë për mediat, partia ka theksuar se debati i tanishëm lidhur me këtë temë është i vonuar dhe ngre dyshime përse është aktualizuar pikërisht tani, në prag të zgjedhjeve parlamentare.
“Edukata seksuale është dashur të trajtohet seriozisht në vitin 2020, kur ne e ngritëm këtë çështje. Kalimi i katër viteve dhe hapja e debatit në këtë moment është shqetësues dhe mund të lidhet me kalkulime politike,” thuhet në deklaratën e FJALA-s.
Partia ka përgëzuar kryetarët e komunave të Republikës së Kosovës për vendimet e tyre që ndalojnë përdorimin e doracakëve për edukatën seksuale në shkolla.
“Falënderojmë të gjithë kryetarët e komunave për angazhimin e tyre në mbrojtjen e vlerave tona dhe për ndalimin e doracakëve që nuk përputhen me kulturën dhe traditat tona,” përfundon deklarata.
Partia “FJALA” u bën thirrje institucioneve arsimore që të trajtojnë këtë temë me kujdes dhe të sigurohen që çdo program të reflektojë nevojat e shoqërisë, duke respektuar normat kulturore dhe morale të vendit. /Kosovatimes/
