Kreu i Lidhjes Demokratike të Kosovës (LDK), Lumir Abdixhiku, zhvilloi një tubim madhështor në Istog, duke shënuar një tjetër moment të rëndësishëm në “Turneun e Ndryshimit.” Në këtë mbrëmje plot energji dhe entuziazëm, Abdixhiku vlerësoi qytetarët e Istogut si shembull të punës dhe vlerave që forcojnë partinë dhe vizionin për Kosovën e ardhshme.
“Falë duartrokitjeve të zjarrta dhe thirrjeve plot energji, dëshmohet se ndryshimi është afër dhe se këtë rrugëtim do ta realizojmë bashkë,” deklaroi Abdixhiku.
Tubimi shërbeu si platformë për të prezantuar kandidatët e degës së Istogut për zgjedhjet e 9 shkurtit: Shkëmb Manaj, Serbeze Kabashi Muçaj dhe Besim Mulaj. Duke vlerësuar përkushtimin e tyre, Abdixhiku theksoi se ata përfaqësojnë shpresën për një Kosovë me mundësi të barabarta për të gjithë.
Abdixhiku veçoi rëndësinë e vizionit të përbashkët për një të ardhme më të mirë, duke nënvizuar se “Turneu i Ndryshimit,” nga Prishtina në Pejë, Shtime, Viti, Podujevë dhe tashmë në Istog, ka treguar se ëndrra për një Kosovë të zhvilluar po bëhet gjithnjë e më e prekshme.
“Faleminderit Istog! Vullneti dhe besimi juaj janë forca që na japin zemër në këtë rrugëtim të madh. Me 9 shkurt, së bashku me qytetarët e Kosovës, do të sjellim ndryshimin e shumëpritur,” përfundoi ai.
Tubimi i Istogut ishte një tjetër dëshmi e mobilizimit të LDK-së në prag të zgjedhjeve, duke përçuar mesazhin e bashkimit dhe shpresës për një Kosovë më të mirë. /Kosovatimes/
