Për dy ditë radhazi ekipi i ekspertëve ndërkombëtarë dhe përfaqësuesve të Agjencisë së Kosovës për Akreditim do të zhvillojë takime në Rektorat dhe hapësira tjera të Universitetit të Prishtinës në kuadër të procesit të riakreditimit institucional.
Kjo është bërë e ditur nga Universiteti i Prishtinës të cilët kanë treguar se sot veçse rektori Arben Hajrullahu bashkë me prorektorët e zëvendëskryesuesen e Këshillit Drejtues janë takuar me ekipin e ekspertëve ndërkombëtarë dhe përfaqësuesve të Agjencisë së Kosovës për Akreditim.
Sipas njoftimit nga UP-ja, ekipi i ekspertëve ndërkombëtar bashkë me zyrtarët e Agjencisë së Kosovës për Akreditim kanë qëndruar në Rektorat dhe hapësira të tjera të Universitetit të Prishtinës për të parë nga afër ambientet e mësimit, punën e personelit dhe gjithë atë që u ofrohet studentëve në këtë universitet.
“Gjatë takimit u zhvilluan diskutime të hapura me pyetje e përgjigje mes përfaqësuesve të Agjencisë së Kosovës për Akreditim dhe Menaxhmentit të Universitetit të Prishtinës”, bëhet e ditur në njoftim.
Gjatë dy ditëve të zhvillimit të procedurave të riakreditimit, janë paraparë edhe takime të grupit nga Agjencia e Akreditimit të Kosovës me trupat e Universitetit të Prishtinës për sigurim të cilësisë, profesorët, studentët dhe të diplomuarit.
Vizita e ekspertëve dhe përfaqësuesve të Agjencisë së Kosovës për Akreditim do të përfundojë pas takimit përmbyllës me Menaxhmentin e Universitetit të Prishtinës.
