Oda Ekonomike e Dubait dhe Oda Ekonomike e Kosovës kanë nënshkruar një ‘Memorandum Mirëkuptimi’ për të forcuar bashkëpunimin ekonomik dhe për të parë mundësi të reja biznesi midis Dubait dhe Kosovës.
Përmes një njoftimi për medie bëhet e ditur se ky memorandum i nënshkruar nga Mohammad Ali Rashed Lootah, kryetar i Odës Ekonomike të Dubait, dhe Lulzim Rafuna, kryetari i Odës Ekonomike të Kosovës, do të hapë rrugën për rritjen e tregtisë, investimeve dhe partneriteteve strategjike.
“Ky partneritet me Dubain i ofron bizneseve të Kosovës një derë të rëndësishme drejt tregjeve globale, duke sjellë mundësi rritjeje për të dyja rajonet”, tha Rafuna.
“Bashkëpunimi ynë me Kosovën reflekton përkushtimin e Dubait për të zgjeruar lidhjet me tregjet dinamike në zhvillim sikurse është Kosova”, u shpreh Lootah.
Tutje bëhet e ditur se kjo marrëveshje përfshin nisma për të mbështetur hyrjen në treg, organizimin e misioneve tregtare dhe për të inkurajuar pjesëmarrjen e përbashkët në ngjarjet kryesore të biznesit, duke hapur rrugë të reja për rritje dhe bashkëpunim ekonomik. /Kosovatimes/
