Pasi gazeta amerikane New York Times publikoi informacione se si Shtëpia e Bardhë, pra presidenti amerikan Joe Biden, autorizoi ukrainasit të përdorin ATACMS për goditje të thella brenda territorit rus, pasuan një sërë reagimesh për këtë vendim.Komentet për këtë vendim vijnë nga e gjithë bota dhe siç pritej, aleatët rusë ishin të parët që e komentuan këtë. Kina ishte ndër vendet e para që reagoi, dhe zëdhënësi i Ambasadës Kineze në SHBA e quajti vendimin “i hedh benzinë zjarrit”.
“Kina kundërshton çdo hap që mund të çojë në përshkallëzimin e konfliktit të Ukrainës dhe përshkallëzimin e tensioneve. Qëndrimi i Kinës për krizën e Ukrainës është konsistent dhe i qartë. Kina është e përkushtuar për avancimin e bisedimeve të paqes dhe kundërshton çdo hap që mund të çojë në përshkallëzim të tensioneve dhe përshkallëzim të situatës në rajon”, kanë thënë ata.
Ata thanë gjithashtu se kjo lëvizje nuk kontribuon në uljen e tensioneve.
“Në vend që të hedhin benzinë në zjarr dhe të nxisin konflikte, palët përkatëse duhet të përpiqen të krijojnë kushtet për një zgjidhje politike të krizës ukrainase përmes dialogut dhe negociatave”, thuhet në njoftim.
Vendimin e komentoi edhe presidenti i Venezuelës Nicolas Maduro.
“Qeveritë e SHBA, Francës dhe Britanisë së Madhe kanë miratuar përdorimin e raketave me rreze të gjatë për të sulmuar Rusinë motrën tonë. Imperializmi amerikan ka hyrë në një fazë çmendurie dhe hakmarrjeje”, tha Maduro.
Është interesante se vendimin e komentuan edhe njerëzit e mbledhur rreth Presidentit të sapozgjedhur të Amerikës, Donald Trump.
Elon Musk, i cili do të drejtojë departamentin e efikasitetit të administratës amerikane në mandatin e Trump, i është bashkuar diskutimit në rrjetin social X. Për statuset ku thuhet se “liberalët e duan luftën”, Musk shkroi “të vërtetën”.
Vendimi i administratës Biden u komentua edhe nga djali i Donald Trump, i cili e kritikoi ashpër këtë veprim.
“Duket se kompleksi ushtarak-industrial dëshiron të sigurohet që Lufta e Tretë Botërore të nisë përpara se babai im të ketë një shans për të bërë paqe dhe për të shpëtuar jetë. Ata duhet të kursejnë triliona dollarë. Mallkuar ju budallenj,” tha Trump Jr.
