Presidenti turk Rexhep Tajip Erdogan i bëri thirrje NATO-s që të analizojë me kujdes dhe të marrë parasysh deklaratën e Rusisë për ndryshimin e doktrinës së saj bërthamore, duke theksuar kërcënimet e luftës bërthamore.
“Nuk mund të themi se ka ndonjë avantazh të luftës me armët bërthamore”, tha Erdogan në një konferencë shtypi në margjinat e samitit të G-20 në Brazil.
Ai vazhdoi duke shprehur shpresën se do të vendoset një armëpushim i përhershëm midis Rusisë dhe Ukrainës, duke theksuar se bota është në pritje të paqes.
Erdogan shtoi se Rusia duhet të ndërmarrë hapa për të mbrojtur veten.
Presidenti rus Vladimir Putin uli të martën pragun për një sulm bërthamor në përgjigje të një game më të gjerë sulmesh konvencionale, ndërsa Moska tha se Ukraina goditi thellë brenda territorit rus duke përdorur raketat amerikane ATACMS.
Erdogan u tha gazetarëve se Turqia duhet të mbajë marrëdhënie të mira me Rusinë dhe Ukrainën dhe se ai do të vazhdojë të bëjë thirrje për paqe, pavarësisht sulmit të Ukrainës ndaj Rusisë me raketat amerikane ATACMS, të cilin ai e quajti një “lëvizje negative”.
