Kryeministrja ITALIANE Giorgia Meloni pësoi një pengesë të rrallë zgjedhore pasi koalicioni i saj konservator humbi kontrollin e një rajoni dhe u mund në një tjetër, tashmë një bastion i qendrës së majtë. Fitoret e dyfishta të Partisë Demokratike (PD) dhe aleatëve të saj në Umbria dhe Emilia-Romagna shërbyen si një nxitje për qendrën e majtë, e cila nuk ka arritur t’i japë goditje politike Melonit që kur ajo mori pushtetin në 2022.
“Kjo është një shenjë se sa larg mund të shkojmë kur jemi të bashkuar dhe të fokusuar në një qëllim,” tha kreu i PD Elly Schlein, duke pranuar se ndarjet e thella midis partive opozitare kishin ndihmuar më parë të djathtën të konsolidonte kontrollin e saj në pjesën më të madhe të Italisë.
E majta ka sunduar rajonin e pasur të Emilia-Romagna që nga Lufta e Dytë Botërore dhe priste konfirmimin e kësaj ndjenje në zgjedhjet lokale të 17 dhe 18 nëntorit. Por rezultati doli të ishte edhe më i mirë se sa pritej, me Michele De Pascale, kandidati i PD, që fitoi pothuajse 57% të votave – dukshëm më shumë se 51% që fitoi e majta në zgjedhjet e fundit të rajonit në 2020.
Vëllezërit e Italisë është ende partia më popullore
Umbria, e cila shtrihet në veri të Romës, ishte gjithashtu një bastion i së majtës derisa e djathta e kundërshtoi atë prirje në vitin 2019, kur një anëtar i partisë anti-imigruese Lidhja u bë guvernator. Por sundimi i së djathtës zgjati vetëm një mandat.
Meloni, e cila është në samitin e G20 në Brazil, e pranoi shpejt humbjen dhe shprehu dëshirën e saj për marrëdhënie konstruktive me fituesit e zgjedhjeve në Umbria dhe Emilia-Romagna.
Pas fitores së zgjedhjeve kombëtare në vitin 2022, koalicioni i Giorgia Melonit fitoi nëntë zgjedhje rajonale, ndërsa qendra e majtë fitoi vetëm një deri dje. E djathta ka dy vjet që kryeson në sondazhet kombëtare dhe partia Vëllezërit e Italisë e Giorgio Melonit është ende partia politike më popullore në vend.
