Kryetari i Lidhjes Demokratike të Kosovës (LDK), Lumir Abdixhiku, ka shpalosur sot programin për shëndetësi, duke e cilësuar atë si një plan ambicioz që sjell një kapërcim të madh në këtë sektor.
Gjatë një prezantimi të detajuar, Abdixhiku ka premtuar investime masive dhe reforma të thella, që do të ndikojnë në transformimin e gjithë sistemit shëndetësor në vend.
Spitali i Ri i Kosovës – Projekti kryesor i programit
Një nga shtyllat kryesore të programit është ndërtimi i Spitalit të Ri të Kosovës, një investim prej 500 milionë eurosh. Ky spital do të ndërtohet në një lokacion të ri dhe do të ketë një strukturë moderne, duke e zëvendësuar infrastrukturën e vjetruar të Qendrës Klinike Universitare të Kosovës (QKUK), ndërtuar që në vitin 1964.
Abdixhiku propozoi që hapësira aktuale e QKUK-së, pas shembjes, të shndërrohet në një kompleks multikulturor me teatro, muze dhe salla për aktivitete artistike.
Fondi i Sigurimeve Shëndetësore dhe menaxhimi ndërkombëtar
Programi parashikon edhe funksionalizimin e Fondit të Sigurimeve Shëndetësore, ku punëdhënësit dhe punëmarrësit do të kontribuojnë me nga 3.5% të pagave.
Gjithashtu, për të përmirësuar cilësinë e shërbimeve, menaxhimi i spitaleve do të ndahet nga puna profesionale e mjekëve, duke iu besuar strukturave private dhe ndërkombëtare.
Garantim i punësimit dhe i specializimit për mjekët
Abdixhiku premtoi punësim të garantuar brenda gjashtë muajve për të gjithë studentët e diplomuar në mjekësi, si dhe sigurimin e specializimit brenda dy viteve për secilin prej tyre.
Digjitalizimi dhe investimet rajonale
Një tjetër prioritet i programit është digjitalizimi i plotë i sistemit shëndetësor, për t’i dhënë fund kaosit të shënimeve manuale në spitale.
Po ashtu, ai njoftoi për një buxhet prej 100 milionë eurosh për spitalet rajonale, me synimin për t’i shndërruar ato në qendra ekselence.
Rritja e stafit dhe përmirësimi i kushteve
Abdixhiku deklaroi se brenda mandatit të parë synon të arrijë normën evropiane prej një mjeku familjar për 1,500 banorë dhe të shtojë 500 infermierë të rinj në sistem. A
i gjithashtu propozoi rritjen e koeficientit të pagave për sektorin shëndetësor në nivelin 150, duke vlerësuar punën e palodhur të stafit shëndetësor në Kosovë.
“Ne besojmë në Kosovë”
Me këtë program, Abdixhiku u shpreh optimist se Kosova mund të shndërrohet në shembull të transformimit rajonal në sektorin shëndetësor.
Ai theksoi se është koha për ndryshim dhe për të kthyer shpresën te qytetarët, duke e bërë shëndetësinë një nga shtyllat kryesore të qeverisjes së ardhshme.
Programi u mirëprit nga mbështetësit e LDK-së dhe u cilësua si një hap i guximshëm për përmirësimin e jetës së qytetarëve të Kosovës. /Kosovatimes/
