Policia e Kosovës ka bërë të ditur se pas veprimeve hetimore disamujore ka kryer kontrolle në katër lokacione të ndryshme në Prishtinë dhe në Mitrovicë,ku janë arrestuar katër persona.
Sipas Policisë, ata dyshohen se në bashkëveprim me njëri-tjetrin dhe me qëllim të përfitimit të kundërligjshëm të pasurisë për vete apo për personin tjetër, kanë përdorur kartelat bankare të shtetasve të ndryshëm pa autorizim, duke bërë transaksione dhe blerje të gjësendeve të ndryshme përmes platformave online.
“Të dyshuarit fillimisht përmes formave të ndryshme kanë arritur të sigurojnë të dhëna elektronike të kartelave bankare, duke përdorur pajisje dhe programe specifike kompjuterike kanë bërë edhe klonimin e kartelave bankare dhe pastaj të njëjtat i kanë përdorur për shërbime të ndryshme, kryesisht online dhe fizike”, thuhet në njoftim.
Gjatë këtij operacioni policor janë arrestuar katër persona të dyshuar, ndërsa, në cilësi të provave materiale janë sekuestruar dy kompjuterë, rreth 10,000.00 (dhjetëmijë) euro në valuta të ndryshme, tetë telefona mobilë, tri vetura, një motoçikletë,pajisje për klonim të kartelave bankare, kartela të zbrazëta për qëllim të klonimit, si dhe dokumente relevante që ndërlidhen me veprën penale.
Tutje theksohet se me vendim të prokurorit kompetent tre nga personat e dyshuar janë dërguar në mbajtje, përderisa njëri është liruar në procedurë të rregullt. “Të gjitha veprimet e mëtejme do të ndërmerren në bashkëpunim dhe koordinim me organet e drejtësisë”, thuhet në njoftim. /Kosovatimes/
