“Është arma më e sofistikuar në botë, me komunikim të drejtpërdrejtë nëpërmjet qendrës së komandës nga droni në artilerinë e raketave që qëllon menjëherë vendin dhe shkatërron gjithçka. Pa gabim. Më e fortë se HIMARS. Atëherë e kuptoni se çfarë po blejmë.” ka thënë Vuçiq.
Përveç sistemit të ri të artilerisë, Serbia është duke blerë edhe një dron të ri, i cili duhet të jetë dukshëm më i avancuar se flota ekzistuese e Ushtrisë Serbe.
“Ne gjithashtu kemi blerë sisteme të reja, ndoshta disa nga sistemet më të mira të dronëve në botë, dhe kjo duhet të arrijë tek ne që në vitin 2025”, shtoi Vuçiq.
Edhe pse prodhuesi i këtyre dronëve nuk figuron në listë, sugjerimi është shpallja e kompanisë Elbit Systems si një nga kompanitë lidere izraelite nga industria ushtarake. Përkatësisht, kjo kompani para disa ditësh ka bërë të ditur se ka nënshkruar kontrata në vlerë prej 335 milionë dollarësh me një “vend evropian të paidentifikuar” për blerjen e sistemit raketor tokë-tokë PULS dhe avionëve luftarakë pa pilot Hermes 900.
Ndonëse nuk ka asnjë konfirmim zyrtar se bëhet fjalë për këto sisteme dhe Izraelin si shtet nga i cili Serbia do të marrë atë që ka premtuar presidenti Vuçiq, rastësia dhe koha janë shumë sugjeruese.
Nga ana tjetër, marrëdhëniet izraelito-serbe janë në një nivel shumë të lartë, duke qenë se kryeministri izraelit Benjamin Netanyahu vizitoi së fundmi Beogradin.
Marrëdhëniet në rrugën Tel Aviv-Beograd u intensifikuan veçanërisht me shpërthimin e luftës në Gaza dhe Liban, pasi që nga ai moment eksporti i armëve nga Serbia në Izrael u rrit ndjeshëm.
