Ruben Amorim është i bindur se do t’i rikthejë lavdinë Manchester United.
Në konferencën e tij të parë për shtyp, të mbajtur dy ditë para debutimit ndaj Ipswich Town në kuadër të Premier League, Amorim ka shfaqur vetëbesim dhe optimizëm për detyrën e tij të re.
Presioni mbi trajnerin e një prej klubeve më të mëdha në botë shpesh konsiderohet “punë e pamundur,” por portugezi nuk është pajtuar me këtë.
“Më quani naiv, por unë me të vërtetë besoj se jam njeriu i duhur në momentin e duhur. Nuk jam i shqetësuar për këtë”, ka deklaruar ai.
Duke folur për ekipin dhe projektin e tij, Amorim ka theksuar rëndësinë e besimit te lojtarët dhe ndërtimin e një kulture të re brenda klubit. “Besoj shumë te lojtarët. E di që ju media nuk besoni shumë, por unë po. Dua të provoj gjëra të reja. Ju mendoni se nuk është e mundur, unë mendoj ndryshe”, ka shtuar ai. “Ne po ndërtojmë një klub të ri. Jam një njeri ndryshe. Ky është klubi më i mirë në Angli. Duam të fitojmë, kjo është gjithçka”.
Amorim, i cili fitoi dy tituj të Primeira Ligës me Sporting Lisbonën, përfshirë një që i dha fund një pritjeje nëntëmbëdhjetëvjeçare për kampionatin, konsiderohet një nga trajnerët më të talentuar të rinj në Evropë. Pas shkarkimit të Erik ten Hag më 28 tetor, ndërsa United ishte në vendin e katërmbëdhjetë në ligë, klubi veproi shpejt për të siguruar shërbimet e tij.
Në periudhën kalimtare, Ruud van Nistelrooy, i emëruar trajner i përkohshëm, arriti të ringjallë ekipin, duke e udhëhequr drejt tre fitoreve në katër ndeshje, duke e çuar në vendin e trembëdhjetë, vetëm katër pikë larg zonës së Champions League.
