Presidenti i Shteteve të Bashkuara të Amerikës, Joe Biden, ka reaguar ndaj vendimit të Gjykatës Ndërkombëtare të Drejtësisë për lëshimin e urdhrit për arrestimin e kryeministrit izraelit Benjamin Netanyahu, duke e vlerësuar këtë vendim si të egër dhe të turpshëm.
Duke komentuar vendimin e Gjykatës Ndërkombëtare të Drejtësisë, Biden tha se Netanyahu dhe Hamasi nuk mund të vihen në të njëjtin nivel.
“Më lejoni të jem i qartë edhe një herë: çfarëdo që të nënkuptojë Gjykata Ndërkombëtare e Drejtësisë, nuk ka asnjë ekuivalencë, asnjë, midis Izraelit dhe Hamasit. Ne do të qëndrojmë gjithmonë me Izraelin kundër kërcënimeve ndaj sigurisë së tij,” tha Biden.
Pak më parë, siç dihet, ka folur edhe zëdhënësja e Shtëpisë së Bardhë, Karine Jean-Pierre.
Ne e hedhim poshtë vendimin e gjykatës për lëshimin e urdhër-arrestit për zyrtarët e lartë izraelitë. “Ne mbetemi thellësisht të shqetësuar për nxitimin e prokurorit për të kërkuar urdhra arresti dhe gabimet shqetësuese në procesin që çuan në këtë vendim”, tha ajo.
Kujtojmë se Gjykata Ndërkombëtare e Drejtësisë mori vendim të enjten për të lëshuar një urdhër arresti për kryeministrin e Izraelit Benjamin Netanyahu dhe ish-ministrin e Mbrojtjes të këtij vendi, Yoav Gallant.
Gallant dhe Netanyahu janë subjekt i një hetimi ndërkombëtar për, sipas Gjykatës Penale Ndërkombëtare, krimet e luftës në Gaza, ku më shumë se 40,000 palestinezë janë vrarë që nga 7 tetori 2023.
