Federata Finlandeze e Futbollit ka marrë vendimin për të shkarkuar trajnerin Markku Kanerva, pas një serie rezultatesh të dobëta në Ligën e Kombeve.
Finlanda ka pësuar gjashtë humbje në po aq ndeshje në Ligën B, duke mos arritur asnjë rezultat pozitiv gjatë këtij kompeticioni.
Presidenti i Federatës, Ari Lahti, ka thënë se vendimi ishte i pashmangshëm, duke theksuar se pritshmëritë për përmirësim nuk u realizuan.
“Kur rinovuam kontratën me Kanerva në qershor, nevoja për ndryshime në lojë u njoh dhe u pranua nga të dyja palët. Ishim të bindur se kjo do të ndodhte dhe ky ishte synimi ynë”, ka deklaruar Lahti. “Në ndeshjet e Ligës së Kombeve, loja duhej të përmirësohej për të qenë gati për kualifikueset e Kupës së Botës. Kishte disa shkëndija përmirësimi, por zhvillimi nuk ishte i mjaftueshëm. Tani të gjithë duhet të përballemi me këtë fakt”.
