GJERMANIA filloi të punojë më intensivisht në përgatitjet për situata të mundshme krizash, duke përfshirë skenarët e luftës që do të preknin drejtpërdrejt vendin. Sipas Frankfurter Allgemeine Zeitung (FAZ), Bundeswehr-i ka zhvilluar një dokument strategjik të quajtur Plani i Operacionit Gjermani, i cili detajon rolin e ekonomisë dhe sektorëve kyç të infrastrukturës në rast të një konflikti të armatosur.
Një nga elementët kyç të këtij plani është bashkëpunimi me sektorin privat për të siguruar furnizim dhe për të ruajtur funksionalitetin e sektorëve kyç në rast krize. Së fundmi në Hamburg u mbajt një takim me përfaqësues të kompanive logjistike, ku autoritetet ushtarake prezantuan udhëzimet për përgatitjen në situata krize. U theksua se logjistika do të luajë një rol kyç për të mundësuar mobilizimin e forcave dhe ruajtjen e stabilitetit brenda vendit. Sipas FAZ, Bundeswehr ka përpiluar një listë të objekteve dhe infrastrukturës prioritare që duhet të mbrohen në rast lufte, duke përfshirë qendrat e transportit, magazinat dhe sistemet e energjisë.
Sipas skenarit që parashikon reagimin e NATO-s ndaj një konflikti të mundshëm me Rusinë, është planifikuar mobilizimi i rreth 800 mijë ushtarëve dhe 200 mijë automjeteve përmes territorit gjerman. Është e qartë se një operacion i tillë kërkon planifikim dhe koordinim jashtëzakonisht të saktë me sektorin civil, shkruan FAZ.
Tensionet gjeopolitike në rritje
Këto masa vijnë në kontekstin e rritjes së tensioneve gjeopolitike, veçanërisht pas pushtimit të Ukrainës nga Rusia.
Përveç Gjermanisë, edhe vende të tjera evropiane po i shtojnë përgatitjet për skenarë të paparashikueshëm. Vendet nordike, si Suedia, Finlanda dhe Norvegjia, po këshillojnë gjithashtu qytetarët e tyre për mënyrat për t’u përgatitur për situata të mundshme krize, duke përfshirë sigurimin e furnizimeve bazë me ushqim dhe ujë.
Ministria gjermane e Mbrojtjes përditëson rregullisht planet e saj, duke i përshtatur ato me ndryshimet në mjedisin e sigurisë.
