Autoritetet e Kosovës ia kanë refuzuar kërkesën për azil Sitora Atomamadovës, një shtetase të Taxhikistanit, e cila ka jetuar në Kosovë për më shumë se 20 vjet.
Arsyet për vendimin nuk dihen ende, ndërsa avokati i saj, Labinot Vata, i tha Radios Evropa e Lirë se do të bëjë ankesë mbi këtë vendim.
Atomamadova, që nga fillimi i nëntorit po mbahet në Qendrën e Paraburgimit për të Huajt në Vranidoll, pranë kryeqytetit të Kosovës, Prishtinë, pasi ka marrë një urdhër dëbimi nga Kosova.
Asaj paraprakisht i është refuzuar aplikimi për shtetësi dhe i është revokuar leja e qëndrimit në Kosovë, vendime për të cilat ajo është ankuar, duke bërë paralelisht kërkesë për azil.
Arsyet për këto vendime ndaj saj nuk dihen publikisht, ndonëse mediat lokale më 5 nëntor raportuan se ajo dyshohet për spiunazh për Rusinë, informacion i pa konfirmuar zyrtarisht.
Institucionet e Kosovës janë mbyllur për të dhënë informacion lidhur me këtë çështje, si dhe kanë refuzuar kërkesën e Radios Evropa e Lirë për vizitë dhe intervistë me Atomamadovën.
Shërbimi taxhik i Radios Evropa e Lirë, i njohur lokalisht si Radio Ozodi, ditë më parë, kontaktoi familjen e Atomamadovës, e cila konfirmoi se ajo ka jetuar në Kosovë për një kohë të gjatë.
Edhe avokati i saj i kishte thënë REL-it se klientja e tij ka jetuar në Kosovë që nga viti 2001.
Ai ka thënë se, sipas informacionit nga klientja e tij, ajo kishte punuar ose ishte angazhuar si përkthyese në organizata të njohura lokale dhe ndërkombëtare dhe kishte kryer shkollim për infermieri.
Ndër organizatat e përmendura janë misioni i Kombeve të Bashkuara në Kosovë (UNMIK) dhe misioni paqeruajtës i NATO-s (KFOR).
UNMIK-u në një përgjigje për REL-in më 18 nëntor, tha se sipas të dhënave që kanë “Sitora Atomamadova nuk ka punuar për UNMIK-un”.
Në anën tjetër, KFOR-i, më 19 nëntor, i tha REL-it se ky lloj informacioni (nëse Atomamadova ka punuar aty) “nuk mund të zbulohet për shkak të rregullativës për mbrojtje të privatësisë”.
E lindur në vitin 1972 në qytetin Khorog të Taxhikistanit, Atomamadova e la vendin e saj në fillim të viteve 2000.
Familja e saj pretendon se ajo nuk ka lidhje me Rusinë, megjithëse e vizitoi vendin dhjetë vjet më parë për të takuar nënën e saj, e cila ishte duke vizituar një anëtar tjetër të familjes.
Taxhikistani ishte pjesë e Bashkimit Sovjetik deri në shpalljen e pavarësisë më 1991.
Megjithatë, vendi u përball me një luftë civile të ashpër nga viti 1992 deri më 1997 dhe që atëherë është udhëhequr nga presidenti Emomali Rahmon.
Sipas familjes së saj, në Kosovë, ajo ka punuar si përkthyese dhe madje edhe si mësuese anglishteje në disa raste.
Në vitet e fundit, gjashtë shtetas të Taxhikistanit janë dëbuar ose ekstraduar nga vende të ndryshme evropiane.
Kjo është shtuar veçanërisht pasi Rusia akuzoi shtetas të Taxhikistanit për sulmin terrorist në Crocus City Hall në Moskë dhe ka pasur raportime për taxhikë që kanë marrë pjesë në sulme terroriste në Iran dhe Turqi dhe që përgatiteshin për sulme të tilla në Gjermani.
Të gjithë shtetasit e Taxhikistanit të dëbuar ose ekstraduar pa përjashtim u dënuan me dënime të gjata me burgim.
Gjatë periudhës 2018-2022 , janë ekzekutuar 550 largime me forcë nga territori i Republikës së Kosovës.
Numri më i madh i personave të larguar ishin nga Shqipëria me 80 për qind, 9 për qind ishin qytetarë nga Serbia dhe 11 për qind nga vendet e tjera.
