Trajneri i Aston Villa, Unai Emery, ka thënë se për ekipin e tij përballja kundër Juventusit është e rëndësishme, duke u shprehur se skuadra synon kalimin në fazën tjetër të Champions League.
Aston Villa do të përballet nesër me Juventusin. Skuadra angleze renditet në vendin e tetë të tabelës, ndërsa italianët mbajnë vendin e njëmbëdhjetë.
“Nesër janë tre pikë shumë të rëndësishme, por edhe nëse nuk fitojmë, marrja e një pike është e mirë sepse ne jemi në tetë vendet e para në tabelë. Duam të kalojmë në fazën tjetër, dhe nëse fitojmë nesër, ndoshta mund të bëhemi pretendentë për të arritur këtë qëllim” është shprehur Emery.
Në analizën e tij për Juventusin, Emery e ka vlerësuar skuadrën italiane për forcën e saj mbrojtëse dhe aftësinë për të kontrolluar ndeshjen. “Juve është shumë e fortë në mbrojtje, jo vetëm me top por edhe pa të. Ata po ndërtojnë një ekip që përpiqet të ruajë kontrollin e ndeshjes, duke qëndruar mirë në prapavijë. Pa Vlahovic mund të ndryshojë diçka”, ka thënë trajneri spanjoll.
Aston Villa po përballet edhe me shqetësime për lëndimet, por Emery ka konfirmuar se Ezri Konsa dhe Boubacar Kamara do të jenë të gatshëm për këtë përballje, ndërsa Amadou Onana dhe Jacob Ramsey do të mungojnë për shkak të dëmtimeve.
