Në mbledhjen e sotme që po mbahet qeveria ka miratuar projektligjin për Inspektoratin e Arsimit në Republikën e Kosovës.
Kryeministri Albin Kurti tha se “synimi i këtij projektligji është trajtimi dhe mbikëqyrja e zbatimit të legjislacionit të aplikueshëm në të gjitha institucionet publike dhe private të cilat ofrojnë shërbime edukative, arsimore dhe aftësuese”.
Kurse Ministrja e Arsimit, Arbërie Nagavci tha se ky projektligj përcakton statusin e Inspektoratit të Arsimit në Kosovë, mënyrën e organizimit, kompetencat e përgjegjësitë.
Ajo tha se ky është “mekanizëm i rëndësisë së veçantë”, dhe shtoi se presin që ky projektligj ta bëjë edhe “përmirësimin e cilësisë në arsim”.
Po ashtu qeveria ka formuar Komisionin Ad-hoc për vlerësimin profesional për pranim për pozitën si kryeinspektor shëndetësor në Inspektoratin Shëndetësor.
Ministri i Shëndetësisë, Arben Vitia, ka theksuar si prioritet reagimin më të shpejtë ndaj shkeljeve potenciale të të drejtave të pacientëve.
“Fuqizimi i kapaciteteve ekzistuese është prioritet strategjik i qeverisë duke përmirësuar kapacitetet tona, ne do të kemi mundësi të reagojmë më shpejtë ndaj shkeljeve potenciale të të drejtave të pacientëve që të ndëshkohen ata që shkelin të drejtat dhe legjislacionin në fuqi”, tha Vitia.
Vitia tha se synon forcimin e mbikëqyrjes dhe të siguron standarde më të larta të kujdesit shëndetësor, që të respektohen në çdo institucion shëndetësor në Republikën e Kosovës.
