Atalanta po mendon për ta rinovuar kontratën e Ademola Lookman, e cila skadon në vitin 2026.
Klubi italian ka propozuar një marrëveshje të re që përfshin një rritje të ndjeshme të pagës, duke treguar vendosmërinë për ta mbajtur anësorin nigerian në Bergamo për një kohë të gjatë.
Ndërkohë, skuadra po performon fuqishëm si në Serie A, ku synon titullin, ashtu edhe në Champions League. Për këtë arsye, Atalanta ka bërë të qartë se nuk planifikon të lejojë largimin e lojtarëve kyç gjatë muajit janar, përfshirë Lookman. Klubi ka vendosur që njëzet e gjashtë vjeçari nuk do të largohet para ndeshjes së rëndësishme të Champions League kundër Barcelonës më 29 janar, vetëm disa ditë para mbylljes së merkatos dimërore më 2 shkurt, edhe nëse arrin një ofertë e jashtëzakonshme.
Megjithatë, e ardhmja e tij mund të jetë objekt diskutimi në verë, veçanërisht nëse negociatat për rinovimin e kontratës ngecin. Atalanta e vlerëson Lookman me një shifër prej 60–70 milionë euro, një vlerësim që konsiderohet i arsyeshëm nga gjigantët evropianë si PSG dhe Manchester United, të cilët vazhdojnë ta monitorojnë situatën.
Pavarësisht përpjekjeve konkrete të PSG-së për ta transferuar verën e kaluar, asnjë prej klubeve të interesuara, përfshirë edhe Real Madridin, nuk ka ndërmarrë hapa të rëndësishëm kohët e fundit.
