Rebelët islamikë sirianë kanë hyrë në qytetin me një milion banorë, Aleppo, vetëm tre ditë pas një ofensive të befasishme. Është hera e parë që ata kanë hyrë në qytetin e dytë më të madh të vendit që kur forcat e presidentit Assad e rimorën atë në vitin 2016.
Forcat rebele filluan një sulm të befasishëm këtë javë, duke përfshirë disa fshatra jashtë qytetit dhe duke rindezur një konflikt që kishte qenë kryesisht statik prej vitesh.
Pamjet e luftëtarëve rebelë që kalojnë nëpër rrugët e shkreta në anën perëndimore të qytetit po përhapen në rrjetet sociale. Një luftëtar dëgjohet duke lavdëruar Zotin ndërsa automjeti i afrohet xhamisë Zine El Abidine në Aleppo perëndimore.
Regjimi pranoi një “sulm të madh”, banorët pretendojnë se ushtria po largohet nga pjesa perëndimore e Alepos
Ushtria zyrtare siriane tha se po përballej me një “sulm të madh” dhe pretendoi se po “përforconte të gjitha vendndodhjet përgjatë fronteve të ndryshme”, por disa banorë të qytetit thanë se forcat e regjimit ishin tërhequr nga disa lagje në Aleppo perëndimore.
Ofensiva, e cila filloi të mërkurën, është konflikti i parë i madh në vite midis opozitës siriane dhe regjimit të presidentit Bashar al-Assad, i cili ka sunduar vendin e shkatërruar nga lufta që nga viti 2000. “Forcat tona kanë filluar të hyjnë në qytetin e Alepos”, njoftoi koalicioni i sapoformuar rebel.
Grupi rebel më herët njoftoi se kishte marrë nën kontroll Qendrën Kërkimore Shkencore Ushtarake të qeverisë siriane në periferi të qytetit të Aleppos pas “përplasjeve intensive me forcat e regjimit dhe milicitë iraniane”.
Kampusi nën sulm
Në një sulm më herët sot, një predhë artilerie goditi një konvikt në Universitetin e Aleppos, duke vrarë katër persona, sipas agjencisë shtetërore të lajmeve siriane SANA, e cila fajësoi fraksionet e opozitës për sulmin. Një zëdhënës i grupeve rebele, Hassan Abdulghani, i hodhi poshtë akuzat e mediave të qeverisë siriane si “gënjeshtra të pabaza”.
Një punonjës i Universitetit të Aleppos, i cili foli në mënyrë anonime për arsye sigurie, ka konfirmuar se një predhë artilerie ka goditur katin e dytë të konviktit ku ndodheshin studentët. Një video që qarkullon në mediat sociale dhe e lokalizuar nga CNN tregon të rinjtë që vrapojnë nga një konvikt në kampusin e Universitetit Aleppo duke mbajtur një person të plagosur.
Gjenerali iranian është vrarë, Irani fajëson Amerikën dhe Izraelin
Të enjten, të paktën 15 civilë u vranë, duke përfshirë gjashtë fëmijë dhe dy gra, dhe 36 të tjerë u plagosën në sulmet ajrore dhe granatimet e zonave rebele në Alepo dhe provincën Idlib, sipas White Helmets, një grup vullnetar shpëtimi. Media shtetërore iraniane njoftoi se gjeneral brigade Kioumars Pourhashemi i Korpusit të Gardës Revolucionare Islamike (IRGC) u vra gjithashtu në qytet.
Duke folur me homologun e tij sirian për përshkallëzimin e luftës, ministri i jashtëm iranian Abbas Araghchi akuzoi Shtetet e Bashkuara dhe Izraelin për “riaktivizimin” e rebelëve dhe “theksoi mbështetjen e vazhdueshme të Iranit” për qeverinë dhe ushtrinë siriane.
Rusia e ndihmoi shumë Asadin
Luftimet që janë ndezur që nga fillimi i luftës civile në Siri në vitin 2011, u ndërprenë kryesisht në vitin 2020, kur Turqia dhe Rusia – një aleat kyç i Sirisë – ndërmjetësuan një armëpushim për të ndaluar shtytjen e qeverisë për të rimarrë Idlib.
Kjo çoi në një qetësi të zgjatur të luftës, por përleshjet sporadike, sulmet ajrore dhe granatimet vazhduan. Idlibi është bastioni i fundit i mbetur i opozitës dhe është shtëpia e më shumë se katër milionë njerëzve, shumë prej të cilëve janë zhvendosur gjatë konfliktit dhe jetojnë në kushte të vështira.
Rusët po ikin
Trupat ruse dhe forcat besnike të presidentit sirian dhe Asadit të mbështetur nga Rusia vazhdojnë të tërhiqen në veri të Sirisë ndërsa rebelët përparojnë në Alepo, qytetin e dytë më të madh të Sirisë.
Rebelët, raporton Kyiv Post, kanë kapur një magazinë të madhe të armëve, municioneve dhe pajisjeve ushtarake ruse. Rebelët po përparojnë aq shpejt sa analistët nuk mund të ndjekin ndryshimet, sipas gazetës, e cila publikoi edhe një video të tërheqjes së forcave ruse.
